Buxheti, zbulohet “ekipi ekzekutiv” i PD
Nga Duma te Tabaku, Mima e Vokshi, të besuarit e kreut të PD
Prezantimi i alternativës opozitare për buxhetin e shtetit projektoi edhe ' ekipin ekzekutiv' të Lulzim Bashës nëse opozita vjen merr votëbesimin e qytetarëve dhe vjen në pushtet. Deputetët dhe aleatët e zgjedhur për të paraqitur alternativën ekonomike të opozitës, lanë të kuptohet se cilët janë të besuarit e Lulzim Bashës nëse ai do të mandatohet si Kryeministër. Nënkryetarja e Komisionit të Ekonomisë në Kuvend, Jorida Tabaku, e cila është edhe zëri më i fortë opozitar në fushën e ekonomisë prezantoi alternativën e PD- së për një ekonomi më të fortë. Duke e cilësuar buxhetin e qeverisë si "buxheti i krizës", Tabaku kujtoi se borxhi publik ka arritur në shifrat e 83%, duke kujtuar se ndikim kryesor për këtë kanë edhe PPPtë. "Vetëm dy investimet më të mëdha, TAP dhe Kaskada e Devollit, sjellin 1 për qind rritje ekonomike. A ka menduar qeveria se si t'i zëvendësojë këto investime? Borxhi Publik ka mbërritur në 83 për qind, sepse kemi një buxhet jashtë buxhetit, për shkak të PPP- ve, që janë jashtë buxhetit dhe jashtë kontrollit. Sistemi bankar është pothuajse në kolaps", tha Tabaku. Në rast të një qeverisjeje të drejtuar nga demokratët, emri i Tabakut shihet si kandidatura kryesore për drejtimin e Ministrisë së Ekonomisë dhe Financave. Ndërkohë që çështjet e infrastrukturës Basha ia ka besuar deputetit Florion Mima. Nënkryetari i Komisionit të Veprimtarive Prodhuese në Kuvend akuzoi qeverinë Rama se përmes buxhetit të saj prej 13,7 miliardë eurosh do të tjetërsojë krejtësisht asetet kryesore të ekonomisë shqiptare. "Qeveria po bëhet gati të koncesionojë 13,7 miliardë euro. Ajo synon të ngrejë një korporatë publike, që ka për qëllim tjetërsimin e pronave publike. Që të jetë e lirë, qeveria ka parashikuar bile që korpora- ta, gjatë punës së vet për privatizimet, nuk do të ndjekë rregullat e njohura të ankandit, por do të veprojë me rregulla të miratuara nga bordi", tha Mima, i cili shihet si i besuar i Bashës për drejtimin e çështjeve të infrastrukturës. Zëdhënësja e Grupit Parlamentar, Grida Duma, ka marrë besimin e kreut të PDsë, për paraqitjen e platformës për çështjet sociale. Duma tha se me këtë buxhet, 38 % e familjeve jetojnë në varfëri absolute. Basha ia ka besuar alternativën e Bujqësisë kreut të Partisë Agrare Ambientaliste, Agron Duka. Aleati i Bashës tha se bujqësia është sektor i vështirë, prandaj s'ka edhe shumë PPP dhe në një kohë që e gjithë bota subvencionon qeverinë në Shqipëri, ka mbështetje me vetëm 20 milionë euro. Për çështjet e bujqësisë foli edhe ish- ministri i LSI- së, Edmond Panariti. Shëndetësia ishte një sektor, i cili u prezantua nga deputeti demokrat i Shkodrës, Bardh Spahia, dhe kreu i Grupit të LSI- së, Petrit Vasili. Spahia theksoi se buxheti i qeverisë është i korrupsionit dhe braktisjes së sistemit shëndetësor dhe zë vetëm 2,9 % të PBB- së.