Pezullimi nga Llalla vë në dyshim karrierën e prokurorit Artur Selmani

Ditën e djeshme, në Komisionin e Pavarur të Kualifikimit ishte prokurori i Prokurorisë së Përgjithshme, Artur Selmani. Kujtojmë se prokurori Selmani ishte edhe një nga shtatë kandidatët për Prokuror të Përgjithshëm të Përkohshëm. Me një karrierë të gjatë në organin e akuzës, prokurori Selmani u përball dje me trupën gjykuese të përbërë nga Roland Ilia, Firdes Shuli dhe Etleda Çiftja. KPK- ja vuri në pikëpyetje karrierën e prokurorit Selmani, pasi një raport i DSIKut thoshte se ai është i papërshtatshëm për vazhdimin e detyrës. Bëhej fjalë për pretencën e dosjes së Masakrës së Coles në Vlorë, ku Selmani, i sapocaktuar në atë kohë prokuror i dosjes, është akuzuar nga familjarët e viktimave se ka favorizuar të pandehurit duke ua rikualifikuar veprat penale për të cilat akuzoheshin. Përkundër këtyre, prokurori Selmani tha në seancë se ai ka një karrierë të gjatë në organin e akuzës dhe ka hetuar çështje me rëndësi si dosja "Hajdari" apo edhe tenderin e pasaportave kur në krye të Ministrisë së Brendshme ishte kreu i tanishëm i opozitës, Lulzim Basha. "Kam hetuar Lulzim Bashën për tenderin e pasaportave, Ndreun dhe Arben Ndokën kur u godit një de- putet. Prokurori i Përgjithshëm më urdhëroi të publikoja videon kur u godit një deputet. Më larguan, më transferuan te Prokuroria e Tiranës", ka thënë Selmani në seancë, duke iu referuar edhe publikimit të videos nga kamerat e sigurisë së Kuvendit kur u sulmua deputeti i PD- së, Gent Strazimiri, nga dy ish- deputetët e PS- së, Arben Ndoka dhe Armando Prenga. Problem për Selmanin janë dhe deklarimet se ka fituar 10 mijë dollarë në baste sportive për tre vjet, duke nënkuptuar se kjo cenonte figurën e tij. "Subjekti i rivlerësimit ka deklaruar se ka fituar nga lotaritë sportive shumën prej 10 mijë dollarësh, në 3 vite. Konkretisht, në vitet 2006, 2007 dhe 2008", relatoi Etleda Çiftja.