Zbulohet grupi i trafikut, 578 kg kanabis në furgon

Arrestohen 8 persona, Policia: Grup i strukturuar kriminal

Një furgon i mbushur me më shumë se gjysmë ton kanabis është sekuestruar nga Policia e Elbasanit, ndërsa trafikantët kanë rënë në pranga.

Policia bëri të ditur se tetë persona u arrestuan, ndërsa një tjetër është ende në kërkim. Bëhet fjalë për një grup të strukturuar kriminal në fushën e trafikut të lëndëve narkotike. Operacioni i koduar “Uraka 2” u krye nga Seksioni për Hetimin e Narkotikëve dhe Trafiqeve në bashkëpunim me Forcën Operacionale të Drejtorisë së Përgjithshme të Policisë së Shtetit. Në momentin e ndalimit të furgonit në rrugën Përrenjas- Pogradec, u bllokuan dhe dy automjete që bënin shoqërimin e tij. Përveç sasisë prej 578 kg kanabis, janë sekuestruar edhe 5800 euro dhe 14 aparate celularë. Lënda narkotike po transportohej në drejtim të qytetit të Korçës dhe ishte ngarkuar në pjesën e pasme të furgonit me thasë të zinj. Që ngarkesa të mos dukej me sy të lirë nga jashtë, organizatorët ishin kujdesur për bllokimin e xhamave të furgonit me kompensatë. “Në kuadër të operacionit ‘ Forca e Ligjit në Territor’, në vijim të kontrolleve të shumta të kryera në ambiente dhe automjete në akset rrugore, si dhe mbi bazën e informacioneve të marra në rrugë operative për një sasi lënde narkotike që po transportohej me një automjet furgon në drejtim të Korçës, nga specialistët e Seksionit për Hetimin e Narkotikëve dhe Trafiqeve në DVP Elbasan në bashkëpunim me Forcën Operacionale të Drejtorisë së Përgjithshme të Policisë së Shtetit, më datë 21.11.2018, rreth orës 10: 00 në fshatin Urakë, Njësia Administrative Rrajcë, Bashkia Përrenjas, në aksin rrugor Përrenjas- Pogradec është ndërhyrë dhe është bllokuar një automjet furgon ‘ Iveco’ me drejtues mjeti shtetasin Aranit Bida, 42 vjeç, banues në Levan, Fier”, bën të ditur Policia. Nga kontrolli i ushtruar në brendësi të furgonit “Ive- co” u gjet një sasi lënde narkotike prej 578 kilogramësh kanabis. Gjithashtu u bllokuan dhe dy makina të marra me qira nga grupi i trafikimit në Fier, të cilat shoqëronin furgonin me lëndë narkotike, konkretisht mjeti tip “Ford Focus” me drejtues shtetasin Arben Tristea , 39 vjeç, banues në Fier, i cili lëvizte para furgonit si dhe mjeti tip “Toyota Corola” me drejtues mjeti Eduard Haxhi, 43 vjeç, banues në Elbasan, i cili lëvizte pas furgonit. Gjatë kontrollit në to u sekuestruan gjithashtu 14 aparate celularë dhe 5800 euro. Përveç tre personave të arrestuar në flagrancë, Policia ka ndaluar dhe pesë persona të tjerë si të dyshuar se janë pjesë e grupit që po organizonte trafikimin e sasisë së kanabisit të ngarkuar në Fier dhe që kishte si destinacion Greqinë. Kjo dyshohet se do të bëhej përmes korrupsionit në doganë ose përmes kalimit nga kufiri i gjelbër. Dy personat që do të prisnin lëndën narkotike në Korçë ishin Andi Qiraxhi, 24 vjeç, banues në Korçë, dhe Elvis Gjona, 42 vjeç, banues në Pogradec. Ndërsa tre të arrestuarit e tjerë që dyshohen si të përfshirë në rrjet janë Erando Mehmeti, 27 vjeç, banues në Fier, Gentjan Rapollari, 42 vjeç, banues në Elbasan, Leonard Demiraj, 34 vjeç, banues në Tiranë dhe A. M., banues në Elbasan, i cili është shpallur në kërkim. Të gjithë të ndaluarit mësohet se ishin miq mes tyre dhe dyshohet se kjo nuk është hera e parë që ata transportojnë sasi të mëdha kanabisi në drejtim të Greqisë. Policia është treguar mjaft e rezervuar duke mos dhënë shumë informacion, ndërsa çështja i ka kaluar Prokurorisë pranë Gjykatës së Shkallës për Krimet e Rënda Tiranë për veprën penale të “Trafikimit të narkotikëve” dhe “Grup i strukturuar kriminal”.