Romanca e Simon Gjonit, shkruar në paketë cigareje, premierë më 25 nëntor
Instrumentistë shqiptarë të shpërndarë nëpër botë mblidhen në një koncert për festat e nëntorit
Kanë kaluar 50 vjet që atëherë, kur kompozitori Simon Gjoni, i frymëzuar prej ardhjes në jetë të të birit dhe diellit pranveror, shkroi romancën “Kur erdhi pranvera”.
Një vepër që nuk është luajtur kurrë më parë dhe tanimë, pas një gjysmë shekulli, del nga sirtari për t’u interpretuar dhe për t’i dhënë jetë orkestrës më të re, me emrin “Albanian Excellence”. Në datën 25 nëntor, me rastin e festave të 28 dhe 29 Nëntorit, Orkestra Ndërkombëtare e “Albanian Excellence” nën drejtimin e Fatos Qerimajt do të japë koncertin “Jehonat e lutjes”. Një aktivitet që zhvillohet nën kujdesin e veçantë të Presidentit të Republikës, Ilir Meta. Në këtë koncert, do interpretohet vepra "Kur erdhi pranvera" e Simon Gjonit dhe një program i zgjedhur me vepra shqiptare e të huaja.
HISTORIA E NJË ROMANCE Romanca “Kur erdhi Pranvera” është kompozuar në vitin 1968. Pas saj fshihet një moment ngazëllimi. Siç e tregojnë familjarët e tij, kompozitori Simon Gjoni, autori i këngës së famshme “Luleborë”, kishte dalë me djalin e sapolindur dhe ishte ulur në një park plot diell. Ndoshta një ditë e freskët e fundit të qershorit. Ndërsa djali flinte në karrocë, ai filloi të kompozonte me mendje mbi fjalët e një poezie të Sulejman Matos. Shpejt i shkroi notat mbi kartonin e paketës së cigareve. Dhe lindi kjo romancë për soprano kolorature. Kështu erdhi pranvera në zemrën e kompozitorit, por edhe një tjetër romancë shqipe. Kjo vepër do të luhet për herë të parë në datën 25 nëntor dhe do të këndohet nga sopra- noja Dëshira Ahmeti Kërliu.
ORKESTRA Ata kanë filluar të vijnë një nga një. Mbërriti Dëshira e më pas Evi BabaLuca dhe Alfred Isallari nga Italia... kështu do të plotësohet Orkestra e Albania Excellence e përbërë nga instrumentistë shqiptarë, që zhvillojnë karrierën e tyre nëpër Europë e më gjerë. “Instrumentistët e kësaj orkestre janë e pjesë e orkestrave anë e kënd Europës. I gjejmë në Itali, në Greqi, Bosnje- Hercegovinë, madje deri në Australi. Ata janë njëherazi edhe pjesë e database të saj, një punë që qendra “Albanian Excellence” e ka nisur që në vitin 2012 dhe që sot numëron të paktën 600 shqiptarë, të cilët i ka intervistuar dhe bërë pjesë të 8 botimeve të një niveli shumë cilësor”, thotë organizatorja Flora Nikolla, e cila shpreson që aktiviteti i kësaj orkestre të mos ndalet në koncertin për festat e Nëntorit, por të ketë një kalendar aktivitetesh përgjatë vitit, ku pjesë e programit do të jenë vepra të kompozitorëve shqiptarë.