Ministri Ahmetaj: Do të financohen 168 milionë euro në ekonomi
Ministria e Financave dhe qeveria gjermane nënshkruan dje protokollin e bisedimeve mbi bashkëpunimin për zhvillim të kryesuar nga ministri Arben Ahmetaj dhe Qeverisë së Republikës Federale të Gjermanisë, kryesuar nga Dirk Schattschneider. Protokolli përmbledh angazhime financimi të qeverisë gjermane në formën e bashkëpunimit financiar ( hua dhe grante nga KFW) si dhe bashkëpunimi teknik ( GIZ) në një total prej rreth 168.4 milionë eurosh, ku 147.9 milionë euro janë bashkëpunim financiar, ndërsa 20.5 milionë euro bashkëpunim teknik, të alokuara në fushat e energjisë, zhvillimit të qëndrueshëm ekonomik dhe furnizimit me ujë/ kanalizime/ mbetje të ngurta. Pas përfundimit të negociatave, ministri i Financave dhe Ekonomisë, Arben Ahmetaj, theksoi faktin se ky vit shënon 30- vjetorin e partneritetit dhe bashkëpunimit të suksesshëm midis Shqipërisë dhe Gjermanisë dhe vlerësoi mbështetjen e Gjermanisë në këto 30 vite, me më shumë se një miliard euro, si në mënyrë direkte, ashtu edhe indirekte. "Përkushtimi i qeverisë së Republikës Federale Gjermane me shumën e angazhuar prej 168,4 milionë eurosh do të jetë thelbësor në thellimin e procesit të transformimit social dhe institucional shqiptar, drejt arritjes së synimit tonë përfundimtar dhe aspiratën e anëtarësimit në BE. Fushat e bashkëpunimit për të cilat u dakordësuam sot ( dje) përputhen shume mirë me prioritetet e qeverisë shqiptare. Qeveria Gjermane, përmes GIZ dhe KFË, do vazhdojë mbështetjen e saj në shumë sektorë me rëndësi strategjikë për vendin tonë, duke përfshirë sektorin e energjisë, transportin e gjelbër dhe mjedisin, menaxhimin e integruar të ujit, menaxhimin e mbeturinave dhe bujqësinë, arsimin dhe aftësimin profesional, zhvillimin e zonave rurale dhe urbane, zhvillimin e turizmit, promovimin e SME- ve dhe përafrimin e aktiviteteve të fermerëve me standardet e Bashkimit Europian etj.", u shpreh ministri Ahmetaj. Ambasadorja e Gjermanisë në Tiranë, Sussane Schütz, shprehu kënaqësinë e saj që bisedimet qeveritare për bashkëpunimin në dy vitet e ardhshme mes Shqipërisë dhe Gjermanisë u përmbyllën me sukses. Ajo theksoi se "shifrat rekord janë provë e rëndësisë së madhe që Qeveria Federale i kushton mbështetjes së Shqipërisë në rrugën e saj drejt Bashkimit Europian. Ne e inkurajojmë Shqipërinë të vijojë në mënyrë konsekuente rrugën e nisur të reformave, veçanërisht atë në sektorin e drejtësisë dhe luftës kundër krimit të organizuar dhe korrupsionit", u shpreh ambasadorja gjermane.