Pasuria dhe figura, Tom Ndreca shkarkohet përfundimisht

Gjyqtari i Gjykatës së Lartë, Tom Ndreca, i cili u shkarkua nga detyra me vendimin e Shkallës së Parë nga Komisioni i Pavarur i Kualifikimit është shkarkuar përfundimisht edhe nga Kolegji i Posaçëm i Apelimit. Vendimi është publikuar dje, ndërsa Ndreca kështu nuk ka më asnjë mundësi të rikthehet në sistem. Kujtojmë se ish- gjyqtari, sipas hetimit të thelluar administrativ, kishte pasuri të pajustifikuar dhe kontakte të papërshtatshme. Sa i përket kriterit të integritetit të figurës, hetimi administrativ vlerësoi se gjyqtari Tom Ndreca nuk kishte plotësuar me saktësi formularët për DSIK- un. Ai, nuk ka deklaruar në këto formularë kontaktet me kunatin e tij, i cili është arrestuar vite më parë me 0.4 gramë kanabis sativa. Pas arrestimit, sipas KPK- së, Policia gjeti 6 kg kanabis në banesën e kunatit të gjyqtarit, mirëpo, hetimet për të u pushuan, pasi "nuk pati prova që droga i përkiste atij". Sipas gjetjeve të KPK- së, Ndreca e ka ditur këtë fakt dhe nuk e ka deklaruar në formularin e pastërtisë së figurës. Por gjyqtari Tom Ndreca dhe avokatja e tij kanë pretenduar se nuk e kanë fshehur këtë fakt, pasi nuk e kanë pasur detyrim për ta deklaruar. Ai është pyetur edhe nëse kishte pasur dijeni për nisjen e procedimit penal për kunatin, por gjyqtari pati shpjeguar se nuk e dinte se çështja kishte përfunduar në Prokurori. Në sitën e vetingut për pasurinë e Ndrecës kaluan: një apartament 120 metra katrorë, i blerë për 2.4 milionë lekë, së bashku me një garazh 18 metra katrorë, i blerë për 470 mijë lekë në Tiranë. Si burim për blerjen e këtij apartamenti ka shërbyer shitja e një apartamenti në Rrëshen dhe kursimet nga paga; një apartament 74 metra katrorë në Golem, i blerë për 31 mijë euro me burime kursimet nga paga; një apartament 93 metra katrorë i blerë për 6 milionë lekë në Tiranë; një automjet "Golf" i blerë për 200 mijë lekë, kursime kesh në vlerën 1.5 milionë lekë; depozitë bankare në emër të bashkëshortes në shumën 3 milionë lekë; depozitë në emër të djalit në vlerë 1 milion lekë dhe llogari rrjedhëse në emër të gjyqtarit në vlerën 1.2 milionë lekë. Hetimi administrativ ka konstatuar deklarata kontradiktore në lidhje me apartamentin 120 metra katrorë. Gjyqtari nuk ka deklaruar garazhin, një automjet që ka blerë i biri në vitin 2005 dhe nuk justifikon kursimet kesh në vlerën 1.5 milionë lekë.