Policia procedim penal Bashës dhe deputetëve të PD
Tri veprat për të cilat akuzohen përfaqësuesit e opozitës
Policia e Shtetit ka proceduar penalisht kryetarin e opozitës, Lulzim Basha dhe deputetë të Grupit Parlamentar të PD- së e LSI- së që kanë mbështetur banorët e Astirit në protestën e tyre. Burime të “Panorama” nga Policia e Shtetit bëjnë me dije se për protestën e zhvilluar në datë 23 nëntor, janë proceduar penalisht për tri vepra shtetasit: Lulzim Basha, Ervin Salianji, Klevis Balliu, Flamur Noka, Enkelejd Alibeaj, Genc Pollo, Aldo Bumçi etj.. Deputetët e PD- së dhe kreu i opozitës Basha janë proceduar për veprat penale, “organizim dhe pjesëmarrje në grumbullime të paligjshme”, “prishje e qetësisë publike” dhe “pengim i qarkullimit të automjeteve”. Krahas të proceduarve nga radhët e përfaqësuesve të opozitës, Policia e Shtetit ka proceduar edhe banorë që kanë protestuar dhe kanë sjellë problematika me bllokimin e rrugës. Policia ka vendosur të pro- cedojë deputetët dhe banorët për protestën e zhvilluar në 23 nëntor, ditën e premte ku për më shumë se dy orë u bllokua qarkullimi i automjeteve në “Unazën e Madhe”. Kjo protestë erdhi menjëherë pas përplasjes së dhunshme që u zhvillua me Policinë e Shtetit në protestën përpara Kuvendit të Shqipërisë. Banorët e “Unazës së Re” që preken nga ndërtimi i segmentit prej 2.2 kilometrash nga zona e njohur si “Pallati me Shigjeta” deri te rrethrrotullimi i sheshit “Shqiponja”, prej më shumë se 23 ditësh, protestojnë kundër projektit. Opozita ka dalë në mbështetje të banorëve dhe i ka kërkuar qeverisë të tërhiqet nga projekti. Banorët kërkojnë dëmshpërblim 100% në vlerën e tregut për të gjithë objektet që preken nga ndërtimi i rrugës, ndërkohë që qeveria ka deklaruar se do të dëmshpërblehen vetëm ata banorë që kanë tituj pronësie.