Karvani i emigrantëve në kufi, Meksika mohon të ketë pakt me Trump
Meksika ka mohuar raportimet mediatike se është arritur një marrëveshje me administratën e Presidentit Donald Trump për të mbajtur në territorin e saj emigrantët që duan të hyjnë ilegalisht në SHBA. Emigrantët shpresojnë në vendimet e gjykatave amerikane të emigracionit që të pengojnë nismat e Presidentit. Trump kërcënoi sërish se do të mbyllte të gjithë kufirin jugor, nëse nuk mund të arrihet marrëveshje mes të dy vendeve. “Fox News” konfirmoi nëpërmjet një organizatori për “Pueblo Sin Fronteras”, grupi që ndihmon organizimin e karvanit kryesor të emigrantëve të Amerikës Qendrore, se anëtarët e karvanit do të marshojnë paqësisht në pikën e hyrjes në San Ysidro, Kaliforni. Marshuesit do të dalin nga stadiumi, ku shumë prej tyre kanë qëndruar të strehuar dhe do të përpiqen të kalojnë kufirin në një test të madh potencial për të dy autoritetet kufitare, si ato të SHBA- ve, edhe zyrtarët meksikanë. Të shtunën u shënua episodi i parë i dhunës në lidhje me karvanët e emigrantëve drejtuar autoriteteve amerikane. Patrulla amerikane e kufirit në Arizona tha se një njeri 31- vjeçar nga Honduras u nda nga karvani dhe hodhi gurë drejt agjentëve dhe një helikopteri të forcave kufitare, pasi i vuri flakën një peme. Trump ka urdhëruar shtimin e forcave kufitare dhe mediat raportuan se ai ka autorizuar të përdorin edhe forcë vdekjeprurëse për të ndaluar njerëzit që duan të hyjnë ilegalisht në SHBA. Marrëveshja në perspektivë ndërmjet SHBA dhe Meksikës shihej si një mënyrë për të mos lejuar mijëra emigrantë të Amerikës Qendrore që të kërkojnë azil në SHBA, një proces që mund të zgjasë disa vite.