PER KESTIN E TRETE Të përndjekurit, lista e re me një mijë përfitues
Ministria e Financave publikon listën e re të një mijë trashëgimtarëve, që përfitojnë këstin e tretë të dëmshpërblimit. Dokumentet që duhen
Ministria e Financës ka bërë gati listën e re të trashëgimtarëve, që do të trajtohen me këst të tretë.
Gazeta boton sot të plotë emrat e përfituesve, të cilët duhet që në këtë fazë të parë të plotësojnë dosjen me dokumentacionin e nevojshëm. Sipas Financave, secili prej trashëgimtarëve duhet të dorëzojë dëshmi trashëgimie ligjore për të dënuarin politik, certifikatë vdekjeje, certifikatë e trungut familjar, dokument identifikimi si edhe numër llogarie bankare aktive. Pra, është e rëndësishme që secili prej përfituesve që ka emrin në listë të dorëzojë këto pesë dokumente dhe këtë gjë mund ta bëjë duke u paraqitur në Drejtorinë e Pagave dhe Dëmshpërblimeve apo edhe nëpërmjet shërbimit postar. Ata të cilët e kanë bërë, pra i kanë dërguar një herë këto dokumente, nuk është e nevojshme që t'i ridërgojnë, mjafton vetëm të presin për të marrë edhe pagesën. Më herët Ministria e Financave ka dhënë sqarime edhe për ato raste kur ka ndërruar jetë njëri prej trashëgimtarëve. Të drejtën e përfitimit e gëzojnë fëmijët e tij. Edhe këta të fundit kanë detyrimin për të përmbushur të gjitha kërkesat e mësipërme sa i takon dokumentacionit. Nuk vlen dhe nuk mund të thuhet e njëjta gjë për përfituesit e radhës së dytë, pasi kur ndërron jetë nipi apo mbesa, e drejta për dëmshpërblim nuk vazhdon më tej. "Në këtë rast, shpërndarja e vlerës së këstit të radhës kryhet sipas rrethit të familjarëve, për trashëgimtarët që jetojnë", thuhet në njoftimin e Financave. PAGESAT DHE FONDI
Për kryerjen e pagesave Ministria ka bërë me dije se do të ndiqet rendi kronologjik, që do të thotë se, ata të cilët kanë përfituar këstin e parë nga radha e trashëgimtarëve, do të kenë mundësi të marrin këstin e tretë. "Drejtoria e Pagesave dhe Dëmshpërblimeve, në zbatim ligjit në fuqi për dëmshpërblimet e ish- të dënuarve politikë, të Vendimeve të Këshillit të Ministrave, të Udhëzimeve të Ministrit të Financave, realizon shpërndarjen e pagesave të këstit të radhës, duke bërë kontrollin e dokumentacionit të depozituar për çdo dosje individuale të ish- të dënuarve politikë pranë kësaj drejtorie dhe duke ndjekur radhën e pagesave të paguara ndër vite. Personat, të cilët nuk dëmshpërblehen për shkak të mosplotësimit të dokumenteve, gëzojnë të drejtën për të marrë këstin e kësaj pagese në fazën tjetër, por jo më vonë se tre vjet pas publikimit të emrit për herë të parë në faqen zyrtare", qartësohet nga Ministria. Janë rreth 300 milionë lekë, të cilat do të ndahen deri në fund të dhjetorit. Ndërkohë, për vitin që vjen nga buxheti i shtetit janë planifikuar 2 miliardë lekë ose rreth 20 milionë dollarë, të cilat në masën më të madhe do të përdoren për trashëgimtarët. AFATET
Për plotësimin e dosjes, trashëgimtarët kanë afat tre muaj nga publikimi i emrit. Por çfarë ndodh pas tejkalimit të këtij afati? Financat sqarojnë se:
"Personat, të cilët nuk dëmshpërblehen për shkak të mosplotësimit të dokumenteve, gëzojnë të drejtën për ta marrë këstin e kësaj pagese në fazën tjetër, por jo më vonë se tre vjet pas publikimit të emrit për herë të parë në faqen zyrtare".