Bashkim doganor dhe heqje e tarifave roaming me Kosovën
Njohje e patentave dhe bashkëpunim në fushën e shëndetësisë
Mbledhja e dy qeverive të Shqipërisë dhe Kosovës, e zhvilluar në Pejë, është përmbyllur me nënshkrimin e nëntë marrëveshjeve mes kryeministrave Edi Rama dhe Ramush Haradinaj.
Ashtu siç edhe kishin paralajmëruar, nga 1 janari i vitit të ardhshëm pritet të kemi një unifikim doganor mes Shqipërisë dhe Kosovës. Rama e Haradinaj firmosën marrëveshjen për kryerjen e veprimeve të përbashkëta të kontrollit doganor në Pikën Kufitare Morinë- Vernicë. “Zero tarifa dhe zero barriera jotarifore brenda gjashtëmujorit të parë të vitit të ardhshëm mes Shqipërisë dhe Kosovës. Nëse jemi këtu, jemi për të bërë këtë e duhet ta bëjmë e nuk kemi nevojë të mblidhemi edhe një herë. Jemi mbledhur 5 herë, sot është koha për të vënë tarifa 100% në veri dhe për të pasur tarifa zero në jug të Kosovës. Duhet të shkojmë drejt bashkimit doganor. Tranzit në 1 janar në Portin e Durrësit për Kosovën dhe hapa të tjerë brenda 6- mujorit të ardhshëm drejt bashkimit doganor. Kush e konsideron këtë si kërcënim, qoftë në Beograd, qoftë në Bruksel, është i mirëpritur të vijë, të ulet në tavolinë, t’i shpjegojmë që nuk është kërcënim, por është një ftesë që të gjithë të tjerët të marrin shembull nga ky bashkëpunim dhe Serbia e para të ndjekë shembullin e këtij bashkëpunimi”, tha Rama. Në 6mujorin e parë të vitit 2019, Shqipëria dhe Kosova do të kenë marrëveshjen e tyre për të hequr tarifat roaming për qytetarët që udhëtojnë në drejtim të të dy vendeve. Qeveria shqiptare ka depozituar në Kuvend një projektligj për të hequr tarifat roaming me Kosovën dhe pritet që muajt e ardhshëm ky projektligj të votohet në Parlament dhe të hyjë në fuqi. Në listën e marrëveshjeve që u nënshkruan mes dy qeverive në Pejë, ishin edhe ato për bashkëpunim në fushën e borxhit publik, financimeve të huaja dhe marrëdhënieve me institucionet financiare ndërkombëtare, bashkëpunimi në fushën e rinisë dhe për njohjen reciproke të patentave për drejtuesit e mjeteve. Pas dakordësisë së arritur, muajt e ardhshëm do të themelohet edhe Dho- ma Ekonomike bilaterale Shqipëri– Kosovë si dhe do të ketë një bashkëpunim mes dy qeverive në fushën e borxhit publik, financimeve të huaja dhe marrëdhënieve me institucionet financiare ndërkombëtare.