Veliaj paqe me banorët e “Astirit”, dy zgjidhjet për shtëpitë
“Banesa sociale gjithë jetën. Leje ndërtimi për ata që kanë tokë”
Bashkia e Tiranës është e vendosur të bëjë paqe me banorët protestues të Unazës së Re, që kundërshtojnë shembjen e shtëpive të palegalizuara.
Kryetari Erion Veliaj shtrëngoi duart dje me disa prej tyre në sallën e Këshillit Bashkiak teksa u parashtroi dy mundësi të reja banorëve që ngelen pa shtëpi. Sipas tij, banesat sociale nuk do të jenë zgjidhje vetëm për tri vite, por pafundësisht, ndërsa poseduesit e shtëpive me tokë iu jepet e drejta të ndërtojnë në pjesën që nuk e prek projekti i Unazës. “Bonusi i qirasë është tri vjet, por edhe atë mund ta rrisim, por banesën sociale mund ta mbajnë gjithë jetën. Jemi përgatitur për këtë kategori. Por ka dhe një kategori të dytë, që ka të bëjë me çështjen e shpronësimit dhe në pjesën më të madhe na rezulton që, përveçse përfitojnë nga shpronësimi, kanë edhe pjesë toke mbrapa. Kush ka tokë tjetër të veten, që s’e prek fare gjurma, të vijë që nesër të aplikojë për ndërtim në bashki. Nëse nuk shpronësohesh, i gjithë territori që preket nga gjurma, që është tokë e juaja, do të qu- het koeficient ndërtimi që do të bësh vetë”, deklaroi Veliaj, duke shtrirë dorën e bashkëpunimit për dakordësim edhe me banorët e tjerë të kësaj zone që e ndoqën nga ekrani. Edhe në daljen e djeshme publike, kryebashkiaku nuk e shmangu apelin për distancimin e tyre nga opozita, duke i ftuar banorët në gjetjen e zgjidhjes reale, pranë bashkisë. Kreu i bashkisë falënderoi banorët që pranuan të bashkëpunojnë dhe u distancuan nga politika që po e shfrytëzon këtë protestë për përfitime politike. “Ka dhe një kategori tjetër që me thënë të drejtën unë s’e ndihmoj dot, kategoria e atyre që duan të kandidojnë në listat e ardhshme, që nuk janë fare banorë aty, por që vijnë me autobusë për to”, tha kreybashkiaku duke shpotitur kështu deputetët e PD- së e LSI- së, të parët që shkojnë në protestat e përditshme të ban- orëve të Unazës së Re. Një ditë më parë, Agjencia e Legalizimeve bëri publik emrat e 107 familjeve që skualifikohen nga procesi për shkak se bie ndesh me një projekt publik si ai i Unazës.
BISEDIMET Vetë banorët që ishin të pranishëm në takimin me kryebashkiakun u bindën se vetëm përmes bisedimeve mund të gjendet zgjidhja dhe jo përmes djegies së gomave e bllokimit të rrugës. “Para dy ditësh ka qenë hera e parë që kam takuar Erion Veliajn në jetën time. Kam kujtuar se ky është ufo, njeriu më i keq në Shqipëri, por sot takova një zotëri. Erdha dhe i thashë problemin. Më tha këtë tokën që do ta marrim këtu, do ta japim mbrapa. M’u duk sikur ma zgjidhi problemin. Ndaj them të flasim, jo të djegim goma e të bllokojmë rrugën”, u shpreh Ukë Çelkolaj me origjinë nga Tropoja, i ardhur prej shumë vitesh në kryeqytet.