Serbët e Veriut shkëpusin lidhjet me Kosovën, krerët japin dorëheqjet në Beograd
Katër fshatrat e banuara nga serbë në pjesën veriore të Kosovës kanë nisur procesin që mund të duket si “shkëputje de facto” nga Kosova, pasi kanë nënshkruar një rezolutë ku kërkojnë ndërprerjen e të gjitha kontakteve me Prishtinën zyrtare. Shkasi ishte vendimi i Qeverisë së Kosovës për taksën 100 për qind për produktet me origjinë nga Serbia duke e bërë shumë të vështirë hyrjen e tyre në Kosovë, ndërkohë që liderët e komunave serbe janë ankuar në mënyrë të ekzagjeruar se “po mbetemi pa bukë”. E tërë pjesa veriore e Kosovës që përflitej prej kohësh si pjesa që do të merrte Serbia në procesin e “korrigjimit të kufirit”, në një marrëveshje të mundshme me Kosovën, tashmë ka institucione që janë jashtë funksionit. Jo vetëm që kanë shkëputur komunikimin zyrtar me Kosovën, por krerët e bashkive të katër fshatrave në fjalë kanë paraqitur dorëheqjen e tyre në Qeverinë e Serbisë, te kreu i Zyrës Serbe për Kosovën, Marko Gjuriç, ndërkohë që institucionet në Kosovë i kanë marrë vesh zhvillimet nga raportimet e mediave dhe jo në rrugë zyrtare prej tyre. Në një mbledhje të jashtëzakonshme të asambleve të katër fshatrave me shumicë serbe në veri të Kosovës, katër kryetarët e komunave Mitrovicë e Veriut ( Goran Rakiq, i cili është edhe kreu i Listës serbe, partia serbe e përfaqësuar në Kuvendin e Kosovës), Leposaviq, Zubin Potok dhe Zveçan kanë dhënë dorëheqjen. Sipas ligjit, do të duhej të organizoheshin zgjedhje të jashtëzakonshme brenda 40 ditëve. Por serbët kanë shkruar në rezolutë se edhe nëse KQZ- ja organizon zgjedhje, ato do të bojkotohen pasi nuk duan komunikim me institucionet e Kosovës. Pas dorëheqjes, Rakiq tha se nuk do të jenë në funksion as institucionet kosovare ku punojnë serbët. “Të gjitha institucionet ku janë serbet nuk janë më në funksion”, tha ai. Kështu u raportua se edhe Gjykata Themelore e Mitrovicës Veriore po bojkoton tërësisht punën. Sipas “Express”, Gjykata Themelore është mbyllur. Po ashtu, Slavko Simiq, anëtar i Shtabit të Krizës të Listës Serbe, ka paralajmëruar largimin nga Kuvendi të këtij subjekti. Serbët e Veriut të Kosovës kanë organizuar dje protestën e dytë kundër taksës 100 për qind për produktet serbe. Sipas mediave, në protestë ishin rreth 8 mijë veta. Kryeministri i Kosovës, Ramush Haradinaj, ka thënë se do të komentojë sot për vendimin e serbëve, ndërsa kreu i Kuvendit të Kosovës, Kadri Veseli, e ka quajtur këtë vendim, të nxituar.