Reagimi i ashpër ndaj Serbisë, Rama: Doja të tërhiqja vëmendjen e BE- së
“Fola sinqerisht, isha i drejtpërdrejtë, nuk mendoj se isha i ashpër, në një moment të caktuar mes Kosovës e Serbisë”
Qëllimi i ashpërsisë ndaj Serbisë dhe Bashkimit Europian në fjalimin e tij në Kosovë, për Kryeministrin Rama lidhet me tërheqjen e vëmendjes ndaj asaj që po ndodh mes dy vendeve.
Gjatë një prononcimi për TV Klan në Pejë, Kryeministri Rama u përgjigjet dhe akuzave të bëra nga politikanët dhe mediat serbe për provokime të tij gjatë mbledhjes së dy qeverive në qytetin e Pejës. “Unë fola sinqerisht, nuk mendoj se isha i ashpër, isha i drejtpërdrejtë, kur thuhet në një moment dhe tension të caktuar siç është momenti aktual mes Kosovës dhe Serbisë, drejtpërdrejtësia duket si ashpërsi. Mirëpres çdo reagim, kjo është jeta demokratike. Secili ka të drejtë të thotë ato që mendon. Qëndrimi im synonte të tërhiqte vëmendjen se debati për tarifën në vetvete është një debat i reduktuar në konsekuencën, ndërkohë që debati i vërtetë lidhet me të gjithë kontekstin me të cilin tarifa 100% vjen si reagim politik. Fjalimi synonte të tërhiqte vëmendjen. Serbët duhet të pranojnë të jetojnë në paqe”, u shpreh Kryeministri Rama. Presidenti Aleksandër Vuçiç, e cilësoi një hipokrizi për të gjithë shqiptarët mbledhjen e dy qeverive në Pejë. “Është kulmi i hipokrizisë, jo vetëm për shqiptarët që jetojnë në Kosovë dhe Shqipëri, por edhe për të gjithë ata që e lejojnë një gjë të tillë”, citohet të jetë shprehur Vuçiç në mediat serbe. Por Kryeministri Rama shprehet se nuk e ka kompleks aspak të pranojë se Vuçiçin e ka mik, por thotë se kjo miqësi nuk ndikohet nga e vërteta e secilit prej tyre.” Jemi miq dhe nuk kam pse e mohoj, madje mendoj se është një miqësi e vlefshme, përveçse një miqësi normale. Por të vërtetat janë të vërteta. I besoj më shumë asaj shprehjes, ‘ E dua Platonin, por më shumë dua të vërtetën’”, u shpreh Rama. Kreu i qeverisë ka një qëndrim të tij për çështjen e korrigjimit të kufijve. Sipas tij, korrigjimi do t’i shërbente Kosovës vetëm nëse Serbia heq dorë nga bllokimet që u bën proceseve anëtarësuese të Kosovës.” S’jam në një mendje as me Haradinajn, as me Thaçin në kuptimin e ndarjes së mendjes. Qëndrimi im është shumë i thjeshtë, korrigjim kufijsh për çfarë? Nëse flitet për korrigjim për t’u çliruar nga mekanizmat e brendshme që Serbia i ka imponuar jetës demokratike të Kosovës, duke i hapur rrugë normalizimit dhe bashkimit të shqiptarëve është e mirëseardhur. Por nëse flitet për ndryshim për një njohje të kushtëzuar me gjithë këto mekanizma që e pengojnë jetën politike të Kosovës në emër të garantimit të minoriteteve, unë jam kundra”, tha Rama për televizionin Klan. Kryeministri është i bindur se po humbet kohë në një rreth vicioz me hile ballkanike, kur në të vërtetë, sipas tij, Serbia duhet të kuptojë potencialin që ka për të bashkëpunuar me Kosovën si një partner strategjik. Dhe si model për të ndjekur ai risjell në vëmendje edhe një herë, Francën dhe Gjermaninë e Pasluftës së Dytë Botërore.