Balla në PE: Mos kini frikë nga shqiptarët, faktor paqeje në rajon

Në takimin e nivelit të lartë në PE, ku merr pjesë delegacioni shqiptar, eurodeputeti qipriot Takis Hadjigeorgiou i kërkoi shpjegime Taulant Ballës për fjalët e Kryeministrit Edi Rama në mbledhjen e qeverive në Kosovë, në lidhje me bashkëpunimin e dy shteteve në vitin 2025 si dhe qëndrimin me dy fytyra të Serbisë. Sa për bashkimin, Balla theksoi se viti 2025 është vendosur si afat për anëtarësimin në BE, ndërsa siguroi se shqiptarët janë faktor paqeje në rajon. “Mos kini frikë nga bashkëpunimi mes shqiptareve. Jemi faktor i rëndësishëm stabiliteti dhe paqeje në Ballkan. Jemi krenarë që jemi kombi më proeuropian në rajon”, tha kryetari i Grupit Parlamentar Socialist. Ndësa në lidhje me etiketimin për Serbinë si shtet me dy fytyra, Balla përmendi fushatën kundër që Serbia bën për anëtarësimin e Kosovës në organizmat ndërkombëtare. “Është qëndrim me dy fytyra, që nga njëra anë bëhen bisedime, nga ana tjetër Serbia lobon kundër anëtarësimit në organizata ndërkombëtare siç ndodhi me Interpol”, tha Balla. Kreu i grupit të deputetëve socialistë i tha gjithashtu eurodeputetit qipriot se bashkëkombësja e tij Eleni Theocharous nuk kishte pse të merrte pjesë në ceremoninë e varrimit të një personi që qëlloi mbi Policinë. “Nuk e di se pse një eurodeputete qipriote ( Eleni Theocharous) duhet të marrë pjesë në ceremoninë e varrimit të një personi që qëlloi mbi Policinë. Kudo në Europë, të qëllosh mbi Policinë është akt terrorist. Janë të papranueshme për normat dhe vlerat e këtij Parlamenti, qëndrime dhe deklarata të tilla”, tha Balla.