Gjykata dënon me 2 vjet e 6 muaj gjyqtarin e Apelit, Shkëlqim Mirin
Gjykata e Krimeve të Rënda ka vendosur të dënojë me 2 vjet e 6 muaj ish- gjyqtarin e Gjykatës së Apelit Tiranë, Shkëlqim Miri, i cili u shpall fajtor për akuzën e korrupsionit. Dënimi final i tij ishte 3 vjet e 9 muaj, nga 4 vjet që kishte kërkuar Prokuroria e Krimeve të Rënda, por ish- magjistrati përfitoi ulje të dënimit. Gjithashtu, Gjykata e Krimeve të Rënda dënoi edhe me 1 vit e 8 muaj burgim kushëririn e ish- gjyqtarit, Kujtim Mirin. Ky i fundit dyshohet se ka qenë edhe ndërmjetësi për rastin e korrupsionit. Miri, sipas Prokurorisë, ka marrë 30 mijë euro për të votuar pro lënies në fuqi të një vendimi që i kualifikonte veprën penale të vrasjes në plagosje të rëndë me pasojë vdekjen, shtetasit Gentian Doda. Ky i fundit ishte dënuar vite më parë me 20 vjet burg për vrasje me paramendim. Vendimi ndaj tij u dha nga Gjykata e Matit në mungesë, por pas kapjes dhe ekstradimit të tij nga SHBA- të në Shqipëri, Dodës iu bë rigjykim sipas marrëveshjes mes Ministrisë së Drejtësisë dhe autoriteteve amerikane. Në rigjykim, Shkalla e Parë e Matit bëri rikualifikim të veprës penale, duke e dënuar në përfundim me 8 vjet burg Dodën për plagosje me dashje, me pasojë vdekjen. Prokuroria e apeloi vendimin dhe Apeli i Tiranës votoi 2- 1 pro lënies në fuqi. Pikërisht për votën e tij pro, gjyqtari Shkëlqim Miri mori 30 mijë euro nga Gentian Doda. Këto para janë dorëzuar te gjyqtari, sipas Prokurorisë, pas shumë takimesh mes Kujtim Mirit, të afërmit të gjyqtarit dhe të afërmit të Gentian Dodës, Alban Bucit. Takimet janë zhvilluar në një lokal në Fushë- Krujë, në pronësi të një të afërmi tjetër të gjyqtarit Miri dhe më pas janë dorëzuar paratë. Gjithashtu, lidhur me akuzën ka një seri përgjimesh nga ana e Prokurorisë që vërtetojnë pretendimet e saj. Bëhet fjalë për bisedat e Gentian Dodës, i cili ka komunikuar me të afërm të tjerë për të mbledhur shumën e parave që kërkonte gjyqtari. Dje Gjykata vendosi që t’ia ndalojë edhe për 3 vjet pas vuajtjes së dënimit, mbajtjen e posteve publike ish- gjyqtarit.