Ngritja e KLP, Marku thërret në mbledhje prokurorët
Thirrja e Markut, pas konfirmimit në detyrë të Besnik Canit
Kryeprokurorja e Përkohshme Arta Marku ka thirrur në mbledhje prokurorët në kuadër të ngritjes së Këshillit të Lartë të Prokurorisë, organ i ri derivat i Reformës në Drejtësi, që do të zgjedhë edhe Kryeprokurorin e Republikës së Shqipërisë. Mbledhja e përgjithshme e prokurorëve do të mbahet më 11 dhjetor në orën 9: 00 në Tiranë dhe ka për qëllim zgjedhjen e anëtarëve të Këshillit të Lartë të Prokurorisë. Njoftimi për mbledhjen erdhi pak orë pasi Komisioni i Pavarur i Kualifikimit vendosi që të rikonfirmojë në detyrë Besnik Canin, kandidatin e fundit për KLP që u përball me vetingun, aktualisht këshilltar në Prokurorinë e Përgjithshme. Pas kalimit të tij në veting, plotësohen kriteret për kandidatët që garojnë për këshilltarë në Këshillin e Lartë të Prokurorisë. Pas rikonfirmimit të Canit, Komisioni i Pavarur i Kualifikimit ka dërguar listën e kandidatëve në Prokurorinë e Përgjithshme dhe Marku ka shpallur datën e mbledhjes së përgjithshme të prokurorëve, ku do të zgjidhen anëtarët e KLP- së. “Njoftohen prokurorët e prokurorive të të gjitha niveleve se mbledhja do të zhvillohet në datën 11.12.2018, ora 09: 00. Ju bëjmë me dije gjithashtu se në bazë të ligjit nr. 115/ 2016, nenit 112, pjesëmarrja në mbledhjen e përgjithshme të prokurorëve për zgjedhjen e anëtarëve të Këshillit të Lartë të Prokurorisë është e detyrueshme”, shkruan shkresa e Markut. Ngritja e KLP- së u vu seriozisht në dyshim, kur kandidatët nga Prokuroritë e Apeleve ngelën në veting. I vetmi që kaloi fillimisht ishte Arben Dollapaj nga Prokuroria e Apelit të Shkodrës. Kjo detyroi Arta Markun që të shpallte dy herë vakancat për një kandidat tjetër nga Apeli. Ai që u afrua ishte Bujar Sheshi nga Prokuroria e Apelit të Krimeve të Rënda, i cili kaloi me sukses vetingun. Ligji parashikon që Këshilli i Lartë i Prokurorisë duhet të ketë 11 anëtarë, nga të cilët gjashtë janë nga radhët e prokurorisë dhe pesë nga radhët e avokatëve, shoqërisë civile, akademikëve etj. Nga këta gjashtë anëtarë prokurorë, tre duhet të jenë nga prokuroritë e Shkallëve të Para, nga të cilët njëri duhet të jetë prokuror nga Rrethet. Po kështu, dy duhet të jenë nga Apeli, njëri prej të cilëve nga Apeli i Rretheve dhe një nga Prokuroria e Përgjithshme. Vetingun e kanë kaluar pesë prokurorë nga Shkalla e Parë, dy prej të cilëve janë nga Prokuroria e Tiranës dhe tre nga Prokuroritë në rrethe. Sa i përket Apelit, në garë kanë qenë katër prokurorë për dy vende: nga këta, vetingun e pati kaluar vetëm Arben Dollapaj dhe më pas Bujar Sheshi që hyri kandidat pas shpalljes së Prokurorisë së Përgjithshme.