“Pakti i May me BE mund të dëmtojë tregtinë SHBA- UK”

Donald Trump ka sugjeruar se marrëveshja Brexit e arritur nga Theresa May mund të kërcënojë një marrëveshje tregtare mes SHBA- ve dhe Mbretërisë së Bashkuar( UK). Sipas Presidentit amerikan, marrëveshja e tërheqjes duket si një marrëveshje shumë e mirë për BE- në dhe do të ndikonte që Britania e Madhe mund të mos ishte në gjendje të tregtojë me SHBA. Por Kryeministrja britanike këmbëngul se është shumë e qartë që Britania e Madhe do të jetë në gjendje të nënshkruajë marrëveshje tregtare me vendet anembanë botës dhe se May është e gatshme të mbrojë marrëveshjen e saj në një debat televiziv me kundërshtarët si udhëheqësi i Laburistëve, Jeremy Corbyn. Është raportuar se debati mund të bëhet më 9 dhjetor, dy ditë përpara votimit parlamentar për marrëveshjen e May. Të martën, duke folur me gazetarët jashtë Shtëpisë së Bardhë, Trump tha se, "Tani për tani, nëse shikoni marrëveshjen, Britania e Madhe mund të mos jetë në gjendje të tregtojë me ne dhe kjo nuk do të ishte një gjë e mirë. Nuk mendoj se ata e kishin qëllim këtë". Trump po sugjeron se marrëveshja e Theresa May me liderët e Bashkimit Europian, ( e quajtur nga BE- ja si marrëveshja më e mirë e mundshme që mund t'i ofrohej Mbretërisë së Bashkuar), nuk do ta lejonte këtë vend të negocionte një marrëveshje tregtie të lirë me SHBA- të. Sipas ministrit të kabinetit britanik, David Lidington, komentet e Trump- it nuk ishin të papritura dhe negociatat për një marrëveshje tregtare me SHBA- të do të ishin gjithmonë sfiduese. "Shtetet e Bashkuara janë një negociator i vështirë', tha ai të martën për "Radio 4" të BBC, duke shtuar se "Presidenti Trump gjithmonë e ka thënë shumë qartë: ' Unë vë Amerikën në radhë të parë'. Epo, unë do të prisja që Kryeministrja britanike të vinte në fillim interesat britanike".