ZGJIDHJA E QEVERISE Ligji i ri, si hipotekohen pronat me mbivendosje
Zbardhen ndryshimet në ligjin për Kadastrën. Si do zgjidhen rastet e mbivendosjeve të pronave dhe kur të drejtën e merr kërkuesi i parë
Qeveria ka deponuar në Kuvend një projektligj, i cili synon të zgjidhë problematikën e mbivendosjes së pronave.
Ligji për Kadastrën vjen si një akt i ri, ku në përbërje të tij është edhe problematika e mbivendosjes së titujve të pronësisë. Relacioni shpjegues i ligjit thekson se në kreun 6 të tij është parashikuar procedura sesi do të veprojë Zyra e Kadastrës kur ka mbivendosje prone ose tentohet të tjetërsohet titulli i pronësisë. "Kreu VI përmban rregullat për trajtimin e mbivendosjeve, si një nga problemet më të mprehta që është shfaqur në vite gjatë veprimtarisë së Zyrës së Regjistrimit të Pasurive të Paluajtshme. Ky kre synon të trajtojë pikërisht mbivendosjet e krijuara para hyrjes në fuqi të këtij projektligji. Trajtimi i tyre ndryshon në varësi të natyrës dhe origjinës së mbivendosjes. Kështu, bëhet dallimi midis mbivendosjes fiktive, që është shkaktuar nga gabimet në hartën kadastrale të administruar nga ZRPP- ja, pra, keqpozicionimi i titujve në këtë hartë apo nga gabimet materiale në elementet hartografike të titujve të pronësisë; dhe nga ana tjetër, mbivendosja reale, e cila përkon me situatën kur për të njëjtën pasuri të paluajtshme ekzistojnë tituj të ndryshëm pronësie që konkurrojnë me njëri- tjetrin", theksohet në relacion. Për trajtimin e këtyre problematikave, në projektligj propozohet që të aplikohet një zgjidhje me ligj, duke ndjekur në mënyrë sistematike disa rregulla të parashikuara në pikën 2, të nenit 37, të projektligjit, të cilat parashikojnë: "Kur pasuria e paluajtshme tokë, objekt i mbivendosjes, është zënë nga ndërtim, mbizotëron titulli i pronësisë që i përket pronarit të ndërtimit; Kur rregulli sipas shkronjës ' a' të kësaj pike nuk gjen zbatim apo është i pamjaftueshëm për të zgjidhur mbivendosjen, mbizotëron titulli i pronësisë që vjen si rezultat i veprimit juridiko- civil të kalimit të së drejtës së pronësisë nga mbajtësi i parë i titullit të pronësisë private, tek ai aktual; Kur nuk gjejnë zbatim rregullat sipas shkronjave ' a' dhe ' b' të kësaj pike apo kur ato janë të pamjaftueshme për të zgjidhur mbivendosjen, zbatohet parimi ' i pari në kohë, i pari në të drejta' dhe mbizotëron titulli që ka origjinën më të hershme. Në kuptim të këtij neni, origjina e titullit përcaktohet nga momenti i krijimit të tij, jo nga ai i regjistrimit në regjistrin publik. ASHK do të marrë rol aktiv në trajtimin ligjor të këtyre situatave, duke kryer vlerësimin e situatës në raport me kriteret e më- sipërme dhe duke i kërkuar Gjykatës që të vendosë mbi çështjen në përputhje me to".
Sipas relacionit, arsyeja për këtë rregullim ligjor lidhet me mprehtësinë e problemit. "Nisur nga raportimet e përfaqësuesve të ZRPP- së, në grupin e punës janë rreth 1000 pasuri, për të cilat Zyrat Vendore të Regjistrimit kanë evidentuar mbiven- dosje reale ( të titujve), deri më sot. Numri total i tyre pritet të jetë më i lartë, pasi shifra në fjalë u përket vetëm evidentimeve të deritanishme, si dhe nga ana tjetër mbetet një pjesë e territorit të vendit ku nuk është kryer ende regjistrimi fillestar i pasurive. Në këto kushte, duke marrë parasysh faktin se fenomeni nuk është spo- radik, justifikohet trajtimi i tij me një rregullim ligjor të posaçëm, si dhe ndërmarrja e rolit aktiv të Agjencisë, e cila do të veprojë në funksion të realizimit të interesit pub- lik, që konsiston në rregullimin e marrëdhënieve juridike të pronësisë dhe konsolidimin e regjistrit publik të pasurive të paluajtshme. Kujtojmë, gjithashtu, se problemi i mbivendosjeve është shkaktuar nga organet shtetërore ( veprimet e paligjshme të tyre apo moskoordinimi mes këtyre organeve), të cilët, në zanafillë, kanë qenë krijuesit e të gjithë titujve të pronësisë private të dhënë pas vitit 1991. Në këtë kuptim, është logjike që vetë shteti shqiptar, nëpërmjet një institucioni të autorizuar me ligj ( ASHK), të investohet për të ndrequr gabimet e shkaktuara prej tij", shprehet në relacion. Këto projektligje priten të futen në kalendarin e punimeve të Kuvendit dhe më pas do të fillojë shqyrtimi në Komisionet Parlamentare. Pritet që ky ligj të miratohet në fund të vitit 2018, që përkon edhe me mbylljen e sesionit parlamentar.