Ceremonia e Pavarësisë, Meta: Largimi i të rinjve është një kambanë alarmi
Apeli i Presidentit: Duhet reflektim nga të gjithë për një mjedis më bashkëpunues, më gjithëpërfshirës
Presidenti Meta organizoi dje një pritje me rastin e Ditës së Pavarësisë. Në këtë aktivitet, kreu i shtetit vlerësoi kontributin e patriotëve për krijimin e shtetit shqiptar.
Krahas kësaj, Meta u ndal edhe te çështjet sociale në vend, siç është emigracioni, ku theksoi se largimi i të rinjve është një kambanë alarmi. “Ne shqiptarët jemi një nga popujt me nivelin më të lartë të emigracionit në botë, por fatmirësisht ia kemi dalë të ushqejmë dhe të përçojmë brez pas brezi, kudo ku jetojmë, dashurinë për atdheun dhe identitetin kombëtar, për gjuhën dhe kulturën, për traditat dhe zakonet e të parëve tanë. Prandaj, edhe diaspora jonë sot është një vlerë e jashtëzakonshme e kombit shqiptar. Duhet të bëjmë çdo përpjekje që Shqipëria të mos mpaket nga emigracioni që po gërryen çdo ditë energjinë dhe potencialin e rinisë shqiptare dhe bashkë me të edhe aftësinë ripërtëritëse e të pazëvendësueshme për përparimin e nesërm të vendit. Kjo është një kambanë alarmi për klasën politike, për të ofruar besim, siguri e mundësi më të mira, më të shpejta e më të qëndrueshme për të rinjtë dhe për forcat më krijuese të shoqërisë”, tha Presidenti.
Në vijim të fjalës së tij, Meta bëri apel për një bashkëpunim të klasës politike, që në vend të mbizotërojë një klimë sa më konstruktive. “Shqiptarët kanë nevojë për forcimin e bashkëjetesës demokratike, për një klimë politike konstruktive, për një paqe sociale ku respekti ndaj lirive, të drejtave dhe dinjitetit njerëzor duhet të jetë prioritet i të gjithëve. Duhet reflektim nga të gjithë, për një mjedis më bashkëpunues, më gjithëpërfshirës, për më shumë siguri juridike për pronën, për punën dhe të drejtat e njeriut. Funksionimi i shtetit ligjor dhe institucioneve të pavarura kërkon dialog dhe bashkëpunim të qëndrueshëm mes shumicës dhe opozitës”, u shpreh Meta.
Kreu i shtetit, duke u ndalur te nevoja për vijimin e punës për ta bërë Shqipërinë një vend anëtar të Bashkimit Europian, kërkoi nga qeveria dhe nga të gjitha institucionet kompetente vijimin e punës për ta përshpejtuar këtë proces. “Shpresa dhe entuziazmi na nevojiten sërish më tepër se kurrë për motivimin dhe ngjalljen e energjive të reja dhe më pozitive drejt së ardhmes europiane të Shqipërisë. Shpresën dhe entu- ziazmin e mbajnë gjallë forcimi i bashkëpunimit dhe unitetit kombëtar; e ushqejnë hapat e shpejtë dhe të sigurt drejt hapjes së negociatave për anëtarësim në BE; respekti rigoroz për Kushtetutën dhe ligjin; lufta pa kompromis kundër krimit të organizuar dhe korrupsionit; forci- mi i institucioneve të pavarura dhe demokracisë; zhvillimi i drejtë ekonomik dhe shoqëror; kontributi për paqen, stabilitetin e sigurinë në rajon dhe kudo në botë; qëndrim dinjitoz përkrah aleatëve strategjikë, SHBA dhe Bashkimit Europian”, tha Presidenti.