Ngritja e KLGJ, si do të përzgjidhen 6 anëtarët
Në rast se ka balotazh, fituesi zgjidhet me short
Kreu i Gjykatës së Lartë ka caktuar 12 dhjetorin e 2018- s si ditën kur do të zhvillohet Mbledhja e Përgjithshme e Gjyqtarëve.
Në këtë mbledhje, e cila është e detyrueshme për të gjithë gjyqtarët, do të përcaktohen edhe rregullat e lojës për zgjedhjen e anëtarëve të Këshillit të Lartë Gjyqësor, organ ky që do të zëvendësojë Këshillin e Lartë të Drejtësisë për nga kompetencat. Po kështu, KLGJ- ja do të zgjedhë edhe anëtarët e Gjykatës së Lartë pasi të formohet, si edhe do të emërojë gjyqtarët në gjykatat e tjera, përfshi këtu edhe Gjykatën Kundër Korrupsionit dhe Krimit të Organizuar, që do të zëvendësojë Gjykatën e Krimeve të Rënda. Në mbledhjen e datës 12 dhjetor 2018, pritet të miratohen modelet e fletëve të votimit për 10 kandidatët që kaluan me sukses vetingun dhe që 6 prej tyre do të zgjidhen anëtarë KLGJ- je. Ligji parashikon se mbledhja e përgjithshme e gjyqtarëve duhet të ketë kuorum, i cili arrihet vetëm nëse të pranishëm janë më shumë se gjysma e numrit të përgjithshëm të gjyqtarëve.
VOTIMI Ligji parashikon që votimi për zgjedhjen e anëtarëve të Këshillit të Lartë Gjyqësor është i fshehtë dhe individual. Jo më vonë se dy ditë nga data e mbledhjes së përgjithshme të gjyqtarëve, kryetari i Gjykatës së Lartë duhet të miratojë fletën tip të votimit, e cila duhet të përmbajë emrat e kandidatëve të regjistruar. Procesi i votimit do të jetë i hapur si për mediat, ashtu edhe për vëzhguesit e tjerë që shprehin interes për procesin. Për administrimin e procesit të votimit do të krijohet Komisioni i Votimit, i përbërë nga 3 ndihmësmagjistratë të Gjykatës së Lartë, të cilët do të zgjidhen me short. Sa u përket fletëve të votimit, ato do të prodhohen duke korresponduar me numrin e gjyqtarëve që do të marrin pjesë në mbledhjen e përgjithshme të gjyqtarëve që në ditën e parë, pra më 12 dhjetor 2018. Në fund të procesit të votimit quhen të zgjedhur kandidatët që kanë marrë numrin më të madh të votave. Në qoftë se dy ose më shumë kandidatë kanë marrë të njëjtin numër votash, fituesi përcaktohet me short midis tyre. Ankimet për shkelje të procedurës që lidhen me thirrjen e mbledhjes së përgjithshme, në verifikimin e pjesëmarrjes, të votimit dhe numërimit të votave, të konstatimit dhe shpalljes së votave të pavlefshme dhe të shpalljes së rezultatit gjatë mbledhjes së përgjithshme të gjyqtarëve për zgjedhjen e anëtarëve të Këshillit të Lartë Gjyqësor, bëhen në Gjykatën Administrative të Apelit jo më vonë se 5 ditë nga dita e shpalljes së vendimit në faqen zyrtare të Gjykatës së Lartë.