Përplasje të ashpra në Paris mes Policisë dhe “jelekëve të verdhë”
Protestat në Paris kundër reformave të Presidentit Emmanuel Macron për ekonominë dhe ambientin po vazhdojnë në mënyrë masive, me grupe të mëdha protestuesish që kanë arritur të zmbrapsin Policinë, që vazhdimisht përpiqet të shpërndajë turmat. Edhe të shtunën, Parisi është shfaqur i mbushur me protestuesit me jelekë të verdhë dhe me vatra zjarri aty këtu, nga djegia e makinave apo kazanëve të plehrave. Mijëra njerëz kishin dalë në bulevardin “Champs Elysees” edhe një herë për të ngritur zërin kundër rritjes së çmimit të karburantit të propozuar nga Presidenti Macron. Protesta e së shtunës është karakterizuar nga përplasje të ashpra mes qytetarëve dhe Policisë, ku janë përdorur granata tymuese, gaz lotsjellës, ujë me presion nga Policia dhe gurë apo mjete të tjera rrethanore nga protestuesit. Macron ka vendosur të marrë masa për të ulur ndotjen e ajrit, duke propozuar rritjen e çmimit të karburanteve. Sipas tij, kjo do orientonte njerëzit që të mos përdornin makinat, por të zgjidhnin mjetet publike apo mjete të tjera transporti e ekologjike. Në janar të këtij viti, qeveria e Macron rriti me 7.6 centë naftën dhe me 3.6 centë benzinën. Por rritje të tjera do të ketë që nga 1 janari 2019 dhe më pas një tjetër të parashikuar për 1 janar 2020. Nafta do rritet me 6.5 centë, ndërsa benzina me 2.9 centë për vitin e ardhshëm. Qytetarët vazhdojnë protestat, të cilat i kanë organizuar në rrjetet sociale pa ndihmën e unioneve dhe i kanë mbajtur përgjatë gjithë muajit nëntor. Macron ka deklaruar prerë se nuk do të tërhiqet nga vendimi.