Mediu: E djathta të ribashkohet, duhen figura të reja
"Kandidatët, në zgjedhjet vendore të përbashkët, jo të copëzuar"
Kreu i Partisë Republikane, Fatmir Mediu, i kërkon kreut të opozitës, Lulzim Basha, ribashkimin e së djathtës dhe sjelljen në drejtim të lidershipit figura të reja intelektuale. Nga Asambleja e PR, Mediu kërkoi që e djathta të ndërmarrë një inventar të ndershëm të kontributeve dhe vlerave historike dhe t'i përfshijë ata të gjithë në funksion të fitores në zgjedhjet e ardhshme. "Të ndërmarrim një inventar të ndershëm të kontributeve dhe vlerave politike. S'kemi komoditetin për të humbur dhe shpërfillur njerëzit tanë. Vitet 2001- 2005 ishin vite të ringritjes së opozitës dhe shoqërisë, një eksperiencë që duhet t'i referohemi. Ajo filloi nga ribashkimi i Partisë Demokratike si partia më e madhe. Themelues, ishministra, deputetë, kryetarë bashkish, këshilltarë, anëtarë të qendrave të votimit, vëzhgues çdo kontribut. Duke sjellë në drejtim të lidershipit figura të reja intelektuale. Më tej vazhdoi me vitalizimin e gjithë partive të djathta, Ball, Legalitet dhe u ndërtua koalicioni më i madh dhe princip- ial me kontribute të të gjithëve. U ndërtua një koalicion që i jepte peshë dhe vlerë çdo partie, pastaj u zhvillua në çdo skaj të Shqipërisë duke ndenjur, folur e dëgjuar njerëzit, duke trokitur jo thjesht në dyert e shtëpive të tyre, por në zemrat e tyre", tha Mediu. Kreu i republikanëve foli edhe për zgjedhjeve vendore dhe për përzgjedhjen e kandidatëve të opozitës. Mediu ka kërkuar që të ketë shtabe të përbashkëta të opozitës dhe kandidatët të mos identifikohen me partinë që i ka propozuar, por të jenë emra të mbështetur plotësisht nga opozita e bashkuar. "Opozita duhet të gjejë rrugën e përzgjedhjes së kandidatëve për bashkitë duke hequr dorë nga makutëria, copëzimi dhe mbivlerësimi i pabazë. Kandidatë të përbashkët janë ata që dalin si produkt i propozimeve të përbashkëta. Prandaj, opozita duhet sa më parë të ndërtojë një strukturë të përbashkët elektorale në qendër dhe në bazë. Dhe pse ka shume fitues të deklaruar, përvoja ka treguar se fitorja nuk është me deklarata, po me punë", theksoi kreu i PR. Mediu kërkon një rishikim të vendimit për bojkotin e Parlamentit, pasi sipas tij, ai u përket qytetarëve dhe jo Edi Ramës. "Pa dyshim që marrëdhëniet me Parlamentin duhet të vendosen në Grupin Parlamentar të opozitës, por jo vetëm duke mos mallkuar të sotmen, por duke ngjallur besimin për të nesërmen. Politika ashtu si jeta është e vështirë, komplekse dhe shpesh e paparashikueshme. Por njëkohësisht politika është mundësia për të shmangur të keqen, surpriza të tjera të padëshirueshme për vendin tonë", tha Mediu.