Rama: Shpifësi dhe përhapësi i shpifjes dënohen njësoj

Kryeministri Rama deklaroi dje se do rrisë gjobat për lajmet e rreme që publikohen në media. Gjatë konferencës ndërkombëtare të organizuar dje me temë "Agjencitë e lajmeve vs Fake News", Rama u shpreh se duhet një rregullim përsa u përket lajmeve të rreme. "Në gjashtë vitet e fundit janë hapur më shumë se 600 media me parashtesën . al. Nuk dihet se kush i financon dhe cilat janë edhe qëllimet e hapjes së tyre. Ne do të vendosim rregulla, duke bërë disa ndërhyrje që nuk do të jetë me prekje të Kodit Penal apo Civil. Por një përditësim të legjislacionit ekzistues. Ne do të rrisim gjobat për lajmet e rreme. Të garantojmë të drejtat e autorit. Do ndëshkojmë shpërhapeshin e shpifjeve, cilido që e merr dhe e replikon është po aq përgjegjës sa media e fillimit. Do të krijojmë një bazë të dhënash kombëtare, ku do të regjistrohen të gjitha portalet online që operojnë në Shqipëri, duke shmangur maksimalisht historitë e fantazmave që operojnë në Shqipëri". Duke folur para përfaqësuesve të agjencive të lajmeve nga rajoni dhe Europa, Kryeministri Rama pohoi se në Shqipëri ka një legjislacion me penalitetet jo të forta përsa i përket shpifjes dhe lajmeve të rreme. Për këtë, Rama u shpreh se: "Do rrisim gjobat për lajmet e rreme dhe kjo është mëse e mjaftueshme për të krijuar një situatë më të favorshme. Do të garantojmë të drejtën e autorit, që mediat të jenë të mbrojtura nga ligji që të mos e shohin veten të kërcënuara sekondën e parë që nxjerrin një prodhim të tyre dhe që merret e shumëfishohet në pafundësi". Lidhur me masat që parashikohen të ndërmerren, Rama u shpreh se ndëshkimi nuk do të shkojë vetëm për autorin e lajmit të rremë, por edhe për median që e transmeton. "Nëse një media është përgjegjëse për një shpifje, edhe çdo njeri apo media tjetër që e përhap dhe e publikon është po aq përgjegjës", u shpreh Rama.