LISTA E PERFITUESVE
Të përndjekurit, si ndahet fondi për trashëgimtarët
Flet drejtori i Pagesave dhe Dëmshpërblimeve në Ministrinë e Financave. Emrat që kanë gati pagesën, procedurat për të marrë paratë e këstit të tretë
Ndryshe nga ish- të përndjekurit që jetojnë, për trashëgimtarët nuk ka një skemë për ndarjen e dëmshpërblimit bazuar mbi kritere specifike.
I vetmi kriter që do të aplikohet, do të jetë ai kronologjik, çka do të thotë se pagesat do të kryhen sipas radhës. Në këto kushte, ata që kanë marrë të parët këstin e parë, do të mund të përfitojnë të parët edhe këstin e tretë. Aktualisht, janë marrë në shqyrtim dosjet e miratuara me Vendim të Këshillit të Ministrave në vitet 2008- 2009. Sipas drejtorit të Pagesave dhe Dëmshpërblimeve në Ministrinë e Financave, Artemon Cukalla, janë 300 ish- të përndjekur nga radhët e trashëgimtarëve që janë gati për pagesë. Ndërkohë, në proces janë edhe 400 dosje të tjera, për të cilat pritet që qytetarët të bëjnë plotësimet me dokumentacionin e nevojshëm.
KËSTET VIJUESE Me dëmshpërblimin e plotë të ish- të dënuarve, që bëjnë pjesë në kategorinë parësore, gjithë fondi vjetor që alokohet nga buxheti i shtetit do të përdoret për trashëgimtarët. Kjo do të sjellë edhe përshpejtim të pagesave për këtë kategori. Cukalla sqaron edhe detyrimet që do të kenë qytetarët për këstet vijuese. "Në rast se dosja, sipas ligjit aktual, bëhet e plotë me dokumentet e kërkuara është shumë e lehtë që kjo dosje të kalojë për pagesë. Qytetarit i lind detyrimi vetëm për të përditësuar numrin e llogarisë bankare. Nuk kërkohen dokumente të tjera, nëse nuk ka ndryshim të gjendjes juridike të dosjes. Procesi do të jetë i lehtë dhe më i shpejtë çfarë është edhe më e rëndësishme", sqaron drejtori i Pagesave dhe Dëmshpërblimeve në Ministrinë e Financave. Vitin që vjen pritet që të përmbyllet kësti i tretë. Në qershor do të nisë shqyrtimi edhe i dosjeve të miratuara në 2 vitet pasuese, përkatësisht 2010- 2011.
DOKUMENTET Secili prej përfituesve ligjorë, që mund të jenë fëmijët ose nipërit dhe mbesat e të dënuarit, duhet të dorëzojë pranë sektorit të pagave dhe dëmshpërblimeve: kopje të letërnjoftimit, numër llogarie, certifikatë vdekjeje, certifikatë të trungut familjar, dëshmi trashëgimie dhe prokurë. Gazeta risjell edhe njëherë në botim emrat e 1140 trashëgimtarëve që duhet të bëjnë plotësimet e nevojshme. Përveçse dorazi, dokumentet mund të dërgohen edhe nëpërmjet shërbimit postar. Kjo u kursen mundin dhe kohën qytetarëve. Vlen të theksohet se ata të cilët e kanë përmbyllur këtë proces, nuk kanë asnjë detyrim. Çka do të thotë, se nëse i kanë dërguar njëherë këto dokumente, nuk është më e nevojshme që t'i ridërgojnë ato. Më herët, Financat kanë sqaruar edhe procedurat për ato raste kur një prej trashëgimtarëve të radhës së parë ka ndërruar jetë. "Kur një trashëgimtar i radhës së parë të ish- të dënuarit politik nuk jeton, për të tërhequr dëmshpërblimin, trashëgimtarët e radhës së dytë, ( fëmijët e tij) duhet të dërgojnë në Ministrinë e Financave dhe Ekonomisë, të gjithë dokumentet e mësipërme" , thuhet në njoftim. Ndërkohë kur një trashëgimtar i radhës së dytë nuk jeton, e drejta e tyre për dëmshpërblim nuk vazhdon më tej. Në këtë rast, shpërndarja e vlerës të këstit të radhës kryhet sipas rrethit të familjarëve, për trashëgimtarët që jetojnë. Për të fituar këtë të drejtë, rrethi i familjarëve duhet të dërgojë në Ministrinë e Financave dhe certifikatën e vdekjes të trashëgimtarit të radhës së dytë që nuk jeton më.