Drejtuesit e agjencive telegrafike të Europës vlerësojnë “Birra Korça”
Mbi 30 drejtorë e kryeredaktorë nga disa shtete u shoqëruan edhe nga kolegë të ATSH- së. "Fabrika, me histori e teknologji moderne"
Përfaqësuesit e 13 shteteve të rrjeteve të agjencive telegrafike e kanë konsideruar fabrikën e "Birra Korça", një potencial të rëndësishëm ekonomik dhe turistik për qytetin, por edhe për të gjithë vendin.
Ishin 30 përfaqësues të agjencive telegrafike të lajmeve për Europën dhe Ballkanin që vizituan dje fabrikën e "Birra Korça", ndërsa shprehën konsideratën e tyre teksa shijuan birrën e sapoprodhuar. Vizitorët ishin kryesisht drejtorë dhe kryeredaktorë të rrjetit të agjencive telegrafike në shtete të tilla si Çekia, Sllovakia, Azerbajxhan, Rumani, Ukrainë, Qipro, Kosovë, Serbi etj.. Gjithashtu, ata ishin të shoqëruar edhe nga një përfaqësi e Agjencisë Telegrafike Shqiptare.
Ata ndanë të njëjtin mendim se fabrika e "Birra Korça" është mjaft moderne dhe prodhon një birrë të standardit të lartë. Drejtuesit e agjencive telegrafike zhvilluan fillimisht një vizitë në qytetin e Korçës dhe pasi janë njohur edhe me historinë e birrës së parë shqiptare që prodhohet në këtë qytet, e kanë parë nga afër teknologjinë dhe prodhimin e saj.
Pas vizitës në ambientet e fabrikës, teknologjia e së cilës krahasohet me fabrikat më moderne të prodhimit të birrës në Europë, ata shijuan edhe produktin e saj e më tej një drekë me gatime tradicionale dhe birrë të freskët në restorantin e "Birra Korça". Historia 90vjeçare e prodhimit të "Birra Korça", por edhe investimi i vitit 2004, i cili i dha asaj një identitet të pakontestueshëm, kanë qenë mbresa e parë për grupin e vizitorëve, një mbresë e cila u shumëfishua pasi shijuan të gjitha llojet e birrës. Birra klasike dhe e lehtë, birra e turbullt dhe birra e zezë mbushën gotat njëra pas tjetrës, duke u shoqëruar edhe me vlerësimet maksimale nga vizitorët.
Fabrika e "Birra Korça" prej vitesh është kthyer në një destinacion shumë të dashur për të gjithë, sepse brenda saj jo vetëm shpaloset një model investimi i ndërthurur edhe me historikun e veçantë të birrës së parë shqiptare, por vizitorët priten si të ishin miqtë e shtëpisë.
"Ishte pa dyshim një vizitë mbresëlënëse. Zgjodhëm të vinim në Korçë si një nga qytetet më të bukura sh- qiptare, por mund të them se pas vizitës këtu në fabrikë, morëm një shije shumë të mirë të elementeve që e përfaqësojnë Korçën. Është një fabrikë dinjitoze, me histori, elemente shumë të rëndësishëm të ruajtur dhe teknologji moderne, ndërsa shija e birrës është fantastike. Nuk e imagjinoja se në një lokalitet kaq të vogël mund të gjendej një fabrikë e tillë", u shpreh Claudia Nicolae, drejtoreshë e Agjencisë Telegrafike në Rumani.