Kreditet e mjekëve, në fund të muajit mbyllet cikli i dytë

Në fund të këtij muaji përfundon edhe cikli i dytë i programit për edukimin në vazhdim për profesionistët e shëndetësisë. Ndonëse kanë mbetur edhe pak ditë nga përfundimi i afatit nga ana e Qendrës Kombëtare për Edukim, nuk ka të dhëna mbi numrin e krediteve që ka marrë secili profesionist. Vendimi i qeverisë parashikonte që brenda një cikli 4- vjeçar, mjekët kanë detyrimin për të mbledhur një numër jo më të vogël se 120 kredite të edukimit në vazhdim, stomatologët dhe farmacistët e ndihmësfarmacistët 60 kredite, ndërsa infermierët e mamitë 40 kredite. Marrja e krediteve është kusht për të ruajtur vendin e punës. Ata, të cilët nuk do të arrijnë të kalojnë këtë prag, do t’i nënshtrohen një testimi për vlerësimin e njohurive. E njëjta gjë vlen edhe për ata, të cilët mbyllin me bilanc zero këtë cikël të dytë, duke mos u angazhuar në përditësimin e njohurive. Eksperienca nga vitet e kaluara ka treguar se kanë qenë jo pak, ata të cilët nuk kanë arritur të marrin asnjë kredit përgjatë gjithë ciklit. Referuar raportit për vitin 2010- 2014, mjekët kanë rezultuar më neglizhentë sa i takon angazhimit të tyre në konferenca, trajnime apo simpoziume. Rregullorja e QKEV- së përcakton qartë se profesionistët e shëndetësisë që nuk përmbushin detyrimet e programit për edukimin në vazhdim, do t’i nënshtrohen testimit. Në nenin 12 të rregullores thuhet se profesionisti pjesëmarrës në provim ka të drejtë të përsërisë një herë provimin e ricertifikimit brenda periudhës 6 mujore të përcaktuar për këtë provim dhe në një kohë të dytë, jo më shumë se 5 herë. Përjashtohen nga detyrimi për të dhënë provimin mjekët, dentistët dhe farmacistët e punësuar në shërbim publik shëndetësor, që për 2 vjet ose më pak arrijnë moshën e pensionit. Të përjashtuar do të jenë edhe ata profesionistë që kanë marrë lejen e ushtrimit të profesionit për herë të parë 2 vjet përpara përfundimit të ciklit të ricertifikimit.