Balla pret deputetin e Macron: Na mbështesni në hapjen e negociatave
Sekretari i Përgjithshëm i Partisë Socialiste, Taulant Balla, gjatë takimit me deputetin francez Joachim SonForget, i partisë së Presidentit francez Emanuel Macron, La République en Marche, kërkoi mbështetjen e Francës për hapjen e negociatave me BE- në. “Duke nënvizuar se Shqipëria ka nisur tashmë procesin ‘ screening’ dhe ka përmbushur një sërë prej detyrave që ka ky proces, Balla kërkoi mbështetjen e partisë La République en Marche në procesin e integrimit të Shqipërisë në Bashkimin Europian”, thuhet në njoftimin e shpërndarë nga zyra e shtypit e Partisë Socialiste. Theksi i këtij takimi ishte Reforma në Drejtësi, ku deputeti Balla theksoi se brenda dhjetorit do të ngrihen të tria institucionet kryesore të drejtësisë: KLGJ, KLP dhe KED dhe se procesi i vetingut tashmë është një sukses. Për sa i përket një prej shqetësimeve kryesore që qeveria franceze ka pasur, atë të azilkërkuesve, gjatë takimit u bë e qartë se Shqipëria tashmë e ka zgjidhur këtë problem dhe se numri i shtetasve që kërkojnë azil është ulur në mënyrë drastike. E jo vetëm kaq, por Shqipëria tashmë është bërë vend pritës i emigrantëve që vijnë nga Siria dhe Iraku, duke e parë atë si rrugë kalimi për në vendet europiane. Nga ana e tij, deputeti francez Forget siguroi se Shqipëria është në rrugën e duhur në përmbushjen e reformave, duke bërë një punë vërtet të mirë për sa i përket luftës kundër krimit të organizuar, korrupsionit dhe emigrimit të paligjshëm. Si njohës i mirë i Rajonit të Ballkanit Perëndimor, deputeti francez theksoi rëndësinë që ka integrimi i këtij rajoni në Bashkimin Europian. Joachim Son- Forget përgëzoi punën e qeverisë së drejtuar nga Kryeministri Rama për të gjitha hapat e ndërmarra drejt rrugës europiane të Shqipërisë. Takimi u mbyll me ftesën nga ana e palës franceze për takime të kryetarit të Grupit, z. Balla në Francë në fund të janarit. Në këtë takim, zoti Balla shoqërohej nga zëvendësministrat Julian Hodaj, Petro Koçi dhe Teuta Vodo, njëkohësisht sekretare e Marrëdhënieve me Jashtë në Partinë Socialiste.