Doli në listën e të shumëkërkuarve, kapet

BURREL – Ishte në listën e më të kërkuarve për Qarkun e Dibrës, kapet 43- vjeçari. Alban Zef Gjegji, banor i fshatit Madhesh në Mat është prangosur mesditën e djeshme nga efektivët e Komisariatit të Matit. Pak ditë më parë, Drejtoria e Policisë Dibër publikoi fotot e disa personave të shpallur në kërkim, mes tyre bënte pjesë dhe 43- vjeçari. Prangosja e tij ka ardhur me ndihmën e banorëve të zonës, të cilët i janë përgjigjur pozitivisht thirrjes së Policisë për të dhënë informacion mbi vendndodhjen e personave të kërkuar. Alban Gjegji është dënuar për veprat penale “Grup i strukturuar kriminal” e “Kultivim i bimëve narkotike”, kryer në bashkëpunim dhe është dënuar me 8 vite burgim. Policia e Matit, sapo është informuar nga banorë të zonës se 43- vjeçari fshihej në zonën pyjore të Trodhnës, është vënë në ndjekje të tij duke bërë të mundur kapjen dhe ndalimin e tij. Gjegji qëndronte kryesisht në stane dhe me uljen e temperaturave qëndrimi i tij në male ishte vështirësuar. Zyrtarë të Policisë Mat thanë se ai akuzohet si bashkëpunëtor i një grupi kriminal që kultivonte dhe shiste lëndë narkotike, kryesisht kanabis sativa. Madje, në pyjet ku të afërmit mbarështonin gjedhë, ai kultivonte bimë narkotike, të cilën ua shiste disa trafikantëve nga Lezha. Dënimi i 43- vjeçarit është dhënë nga Gjykata e Apelit për Krimet e Rënda në Tiranë. Alban Zef Gjegji u arrestua fillimisht në muajin shkurt të këtij viti nga forcat RENEA, në operacionin e koduar “Kulla”, pasi u gjet në shtëpinë e prindërve të tij, në fshatin e thellë malor të Madheshit. Në muajin mars, Gjykata e Dibrës ndryshoi masën e sigurisë dhe u la në “arrest shtëpie” dhe më pas u arratis. a. l