Përfaqësuesi i Qipros: Fabrikën e shoh si një potencial ekonomik
George Peninntaex është drejtues i Agjencisë Telegrafike në Qipro. Ai e vizitoi për herë të parë Korçën dhe siç shprehet, vizita në këtë qytet dhe më tej në fabrikën e "Birra Korça" i kishin lënë mjaft mbresë. Si zgjodhët të vini në Korçë dhe të vizitoni këtë fabrikë? Unë vij nga Qipro dhe është hera e parë që vizitoj Korçën. Ishin pikërisht kolegët tanë shqiptarë që na e sugjeruan vizitën në këtë qytet dhe na thanë që ka shumë elemente që tërheqin vizitorët. Mes tyre na përmendën edhe fabrikën e birrës së parë shqiptare dhe ne sigurisht që shfaqëm interes.
Tani që e vizituat, çfarë mendimi keni?
Ishte diçka e papritur për hir të së vërtetës. Prisja diçka modeste, një fabrikë të thjeshtë që do të prodhonte një birrë tradicionale. Kur hyra këtu, kuptova që po flisnim për diçka të përmasave të mëdha. Fabrika është moderne, historia e saj që nga ndërtimi, mënyra si është ruajtur, investimi dhe teknologjia çeke dhe gjithçka cilësore ishin ajo çfarë zbuluam. Nga ana tjetër, unë e shoh edhe në këndvështrimin e potencialit ekonomik. Është e rëndësishme ekzistenca e saj për këtë qytet.
Çfarë informacioni morët për këtë fabrikë?
Pyeta dhe më thanë që pavarësisht se këtu është gjithçka e mbështetur te teknologjia moderne, aktualisht janë 50 persona të punësuar. Pra, 50 familje që përfitojnë të ardhura nga puna në sektorë të ndryshëm të linjës së prodhimit apo edhe shpërndarjes. Është për t'u përgëzuar fakti që kjo fabrikë vazhdon të operojë atje ku ka zanafillën e saj.
A e shijuat birrën?
Pa diskutim që po. Ishte hera e parë që e provova dhe zgjodha të provoja birrën klasike, por edhe birrën e zezë. Kishin një shije të veçantë, ishte mbresëlënëse. Mësova që kjo birrë edhe eksportohet. Shpresoj që eksporti të rritet dhe të vijë deri në Qipro sepse pa diskutim do të ishte ndër birrat më të konsumuara.
Madje, mund të them se familja ime koleksionon tapa nga shishet e birrës dhe kërkova që disa nga tapat e shisheve të "Birra Korça" të jenë pjesë e koleksionit tim. E meritojnë të renditen mes emrave të birrave të tjera.