Azili në BE, 207 personave iu ndalua udhëtimi nga Rinasi
Masat për festat, shtohet personeli për shërbime në aeroport
Policia Kufitare e Rinasit, me rastin e festave të fundvitit, është angazhuar për përballimin e fluksit të udhëtarëve, rritjen e cilësisë së shërbimit, si dhe për parandalimin dhe goditjen e paligjshmërisë.
Drejtoria Vendore për Kufirin dhe Migracionin Tiranë ka hartuar një plan masash të detajuar për muajin dhjetor, me qëllim përballimin e fluksit në hyrje- dalje në Aeroportin e Rinasit, për parandalimin dhe goditjen e paligjshmërisë duke bashkëpunuar ngushtë me autoritetet e tjera ligjzbatuese. Burime zyrtare të Policisë së Shtetit thanë dje se gjatë muajit nëntor, Policia e Rinasit ka evidentuar dhe goditur 66 raste të paligjshmërisë. Janë arrestuar dhe proceduar 10 persona për përdorim të dokumenteve të falsifikuara. Ndërsa në drejtim të parandalimit të azilkërkimit, u është refuzuar dalja 207 shtetasve, të cilët nuk plotësonin kriteret për të lëvizur në hapësirën Shengen. Nga ana tjetër, Policia tha dje se, po gjatë muajit nëntor, nga ana e Policisë Kufitare janë kapur 9 persona në kërkim për vepra të ndryshme penale për llogari të Drejtorive Vendore të Policisë. Ndërsa janë proceduar penalisht 52 shtetas për kalim të paligjshëm kufiri. Është proceduar penalisht një shtetas për mosdeklarim të hollash në kufi, është arrestuar një tjetër për mitdhënie, si dhe është arrestuar edhe një person për kundërshtim të punonjësve të Policisë. Gjatë muajit nëntor kanë hyrë dhe dalë nëpërmjet Aeroportit të Rinasit 203 694 shtetas shqiptarë dhe të huaj. "Policia Kufitare e Rinasit, për muajin dhjetor 2018, duke pasur parasysh edhe përvojën e viteve të kaluara, por edhe tendencën në rritje të fluksit në hyrje dhe në dalje të qytetarëve dhe turistëve, do shtojë burimet njerëzore me qëllim ofrimin e një shërbimi sa më cilësor, si dhe do bashkëpunojë ngushtë me të gjitha agjencitë e tjera ligjzbatuese për të parandaluar dhe goditur paligjshmërinë", tha dje Policia. Ndërsa ftoi qytetarët që përdorin Aeroportin e Rinasit për të udhëtuar jashtë vendit apo për të ardhur në Shqipëri që të denoncojnë në numrin pa pagesë 112, në aplikacionin "Komisariati Digjital", si dhe në numrin 0800 90 90 çdo parregullsi, çdo vonesë si dhe çdo rast të abuzimit me detyrën nga punonjësit e Policisë, duke iu garantuar një reagim të shpejtë profesional e të paanshëm.