“Kreditorët” e Strindbergut, tri net në “ArTurbina”

E konsideruar si një nga veprat më të fuqishme të August Strindberg, “Kreditorët” vjen në sallën 150- vendëshe të “ArTurbinës” në datat 6, 7 dhe 8 dhjetor, si pjesë e kalendarit të Teatrit Kombëtar. Një tragjikomedi natyraliste, e shkruar në vitin 1889 dhe që vetë Strindberg e ka quajtur “më të pjekurën”, vjen nën regjinë e Luli Hoxhës dhe nën interpretimin e treshes së aktorëve Helidon Fino, Laert Vasili dhe Luli Hoxha. Siç mund të kuptohet edhe nga numri i aktorëve dhe salla e vogël ku do të shfaqet, “Kreditorët” është një shfaqje që trajton çështje delikate të marrëdhënieve mes njerëzve: të burrit me gruan, të gruas me ish- bashkëshortin, mes dy shokësh. E gjithë vepra vërtitet rreth raporteve mes këtyre tri personazheve, Adolfit, një piktori që nis dhe gdhend një nudo gruaje, Gustavit, mikut të tij që del të jetë ish- bashkëshorti i gruas së Adolfit, Teklës. Duket si një variant modern i “Otellos”, ku rolin e Jagos e luan Gustavi, por i trajtuar në një rrafsh më psikologjik. Më shumë kemi të bëjmë me një lojë nervash. Sa i takon titullit “Kreditorët”, ai nuk ka të bëjë me ndonjë kredi bankare. Personazhet i referohen njëri- tjetrit me këtë përcaktim herë pas here gjatë pjesës.

Prezantimi që regjisorja ka vendosur t’i bëjë veprës te publiku dhe ta joshë atë është përmbledhur disi çuditshëm, duke na vënë në dilemë: “A keni parë ndonjëherë ndonjë grua nudo? Patjetër që po! E dini çfarë është? Një i ri me gjoks të mbizhvilluar, një fëmijë që hodhi shtat vrullshëm, një rast anemie kronike që ka hemorragji trembëdhjetë herë në vit. Çfarë mund të presësh nga një krijesë e tillë?”. Do të duhet të shohim pjesën për ta zbuluar...