Dosjet në hetim nga Krimet e Rënda, zbulohet lista me emrat e 22 të zhdukurve në dy vitet e fundit në Vlorë
MES TE DENONCUARVE SI TE ZHDUKUR, EDHE BIZNESMENI ADRIANO JAHO. DYSHIMET PER IMPLIKIME ME DROGEN
Prokuroria e Krimeve të Rënda merr në dorëzim dosjet e ngjarjeve kriminale të ndodhura kohët e fundit në Vlorë.
Pas kalimit të dosjeve me disa të zhdukur në kryeqytet, prokurorët e Krimeve të Rënda kanë nisur tashmë hetimet. "Panorama" mëson se pas publikimit të një deklarate nga ana e Policisë së Vlorës se kemi të bëjmë me 23 persona të zhdukur, dosjet për të paktën tre prej tyre kanë kaluar te Krimet e Rënda. Dy nga të zhdukurit e fundit në Vlorë, të cilët dyshohet se janë ekzekutuar nga grupet kriminale janë Albano Xhaferri dhe Elvis Troqe, të cilët kanë humbur gjurmët përkatësisht në qershor dhe korrik të këtij viti. Dy të rinjtë kishin pak kohë që ishin kthyer nga Spanja dhe ngjarja u mendua se kishte lidhje me prishjet e pazareve të drogës, por të afërmit mohojnë që të kenë pasur njohje me njëritjetrin. Ka qenë një person i identifikuar si Gazmend Merkaj, i cili ka hedhur dritë mbi rrëmbimin e Albano Xhaferrit. Ai ka bërë një kallëzim në Policinë e Fierit, duke u thënë oficerëve të Policisë se Albano Xhaferri është ekzekutuar me çekiç. Sipas tij, ai është ekzekutuar nga tre persona për llogari të Edison Harizajt, i cili u ekzekutua në Durrës tri javë më parë. Ndërsa për zhdukjen e Elvis Troqes, babai i tij është shprehur në media se ka shumë pak gjasa që djali i tij të jetë gjallë. Elvis Troqe u zhduk pasditen e 17 korrikut 2018 në qytetin e Vlorës. Në një video të publikuar në media, i riu shihet teksa hipën në një automjet tip "MercedesBenz" dhe prej atij momenti fati i tij nuk dihet. Ndërsa prej qershorit 2017 rezulton i zhdukur Marjo Metushi, i cili njihej në qytetin e Vlorës si skafist, i cili kishte bërë drejt Italisë rreth 7 rrugë me gomone duke trafikuar kanabis dhe një grup kriminal i detyrohej një sasi parash rreth 200 mijë euro. Edhe për këtë person, babai i tij deklaron se djali i tij është ekzekutuar dhe është zhdukur nga personat që i kishin këtë borxh. Leonard Mehmeti, babai i tre fëmijëve, është një tjetër i zhdukur mesditën e 22 nëntorit të vitit 2016. Leonardi, i njohur me emrin Nani, kishte ngritur bizneset e tij. Një restorant në zonën e "Lungo Mares" dhe një fermë kuajsh në Panaja të Vlorës, ku dhe është parë herën e fundit i gjallë. Vëllai i Nanit ka thënë se nuk ka dyshime se vëllai i tij është ekzekutuar dhe është zhdukur për shkak të prishjes së pazareve të drogës. Mehmeti tregon se i vëllai frekuentonte shpesh Durrësin për shkak të miqësisë që kishte me Ervin Dalipajn dhe Xhino Dautajn. Dalipaj akuzohej për rrëmbimin dhe ekzekutimin e Gazmend Çollakut. Ai së bashku me Dautajn u ekzekutuan në 2016 në autostradën Tiranë- Durrës.