“Fast Track”, shërbim i ri për të marrë tapinë e shtëpisë
Lehtësi për kontratat e shitjes si edhe për rifreskimin e një kartele
Për rifreskimin e një kartele apo harte, për zhbllokimin e një pasurie në bankë apo për kontratat e dhurimit dhe shitjes, të cilat janë edhe praktikat më të shpeshta në Hipotekë, qytetarët nuk do të duhet më të vihen në listë pritjeje.
Me anë të shërbimit "Fast Track" ose "Shërbimi i shpejtë për 24 orë" këto dokumente do të mundësohen brenda ditës për qytetarët, duke kursyer mundin, por njëkohësisht edhe pritjen disaditore. Ky projekt pilot do të nisë zbatimin, fillimisht në Zyrën Vendore të Regjistrimit të Pasurive të Paluajtshme për t'u shtrirë deri në mars të vitit që vjen në të gjitha ZVRPP- të. "Qytetarët dhe bizneset mund të aplikojnë për shërbime të tilla si: Kontratë shitje apo dhurimi; Rifreskim kartele dhe harte; Bllokim/ zhbllokim pasurie në bankë etj., pranë dy sporteleve të dedikuara të agjencisë ADISA dhe përgjigja u shkon një ditë më pas në shtëpinë apo zyrën e tyre përmes Postës Shqiptare. Më parë, afati kohor i ofrimit të këtyre shërbimeve shkonte deri në 9 ditë", bëhet e ditur nga Ministria e Drejtësisë.
GJONAJ E pranishme në ceremoninë e përurimit të këtij shërbimi, ministrja Etilda Gjonaj tha se realizimi praktik i shërbimit të ri nuk ishte aspak i lehtë, për shkak të ndryshimeve strukturore dhe procedurale që duheshin kryer, por me angazhimin e plotë të strukturave përkatëse u bë e mundur që ai të vihej në funksionim në kohë. "Fast Track" është një lehtësi shumë e madhe për qytetarët dhe për disa kategori të caktuara biznesi, siç janë not- erët, ndërtuesit, bankat apo përmbaruesit, të cilët do të kenë tashmë mundësinë të marrin shërbime në një kohë shumë të shkurtër dhe në të njëjtën kohë të mundësojnë edhe ato një shërbim më cilësor për klientët e tyre", ka vënë në dukje ministrja Gjonaj. REFORMA Prej janarit do të nisë funksionimin edhe Agjencia Sh- tetërore e Kadastrës, një strukturë e re, e cila do të ketë në ngarkim të gjitha çështjet e pronësisë. Nëpërmjet bashkimit nën një çati të të tre institucioneve siç janë ATP, ALUIZNI dhe Hipoteka synohet që të shmangen vonesat dhe njëherazi burokracitë, që kanë shoqëruar ndër vite të gjitha çështjet që lidhen me pronësinë. "Qëllimi është zgjidhja njëherë e mirë e problematikave të lidhura me pronën. Qeveria Shqiptare ka si synim të konsolidojë përfundimin e dhënies së titujve të pronësisë nga ligjet e posaçme dhe më pas administrimin korrekt të tyre mbi bazën e një regjistri kadastral mbarëkombëtar, që rrit sigurinë juridike një këtë fushë", theksoi ministrja. Në fund të muajit nëntor Qeveria miratoi edhe dy projektligje mbi bazën e të cilave do të funksionojë edhe ASHK. Sipas draftit "Për Kadastrën" për regjistrimin e pronës në emrin e tyre, qytetarët do të kenë një muaj afat. Nëse kërkesa për regjistrim paraqitet përtej afatit 30- ditor, përveç tarifës së regjistrimit, kërkuesi do të duhet të paguajë edhe një faturë ekstra për çdo ditë vonesë, e barabartë kjo me 10 për qind të tarifës së regjistrimit, por jo më shumë se 300 mijë lekë. Janë me qindra familje të cilat nuk kanë mundur të marrin dokumentin e pronësisë. Arsyet e këtyre vonesave nuk lidhen vetëm me qytetarët, por edhe me institucionin e Hipotekës që nuk iu është përgjigjur në kohë interesit të tyre. Një problematikë kjo, që do të marrë zgjidhje me reformën e nisur.