Prapaskenat e protestës, kush janë “udhëheqësit” e studentëve dhe pse nuk pranojnë ndikim politik
Ministrja e Arsimit Lindita Nikolla shprehet e gatshme të ulet kurdo në bisedime për të dëgjuar shqetësimet e tyre, si të vetmen rrugë për të shkuar drejt zgjidhjes së problemit. "Ua kam thënë çdo ditë pas çdo kërkese. Të fillojmë komunikimin dhe dialogun. Unë jam e gatshme, kur, si dhe ku ata e mendojnë të jemi bashkë për të adresuar çdo shqetësim që ata kanë. Është shumë e rëndësishme që ky dialog të fillojë dhe kjo protestë dinjitoze të sjellë një gjithëpërfshirje për të modernizuar të gjithë institucionet tona të arsimit të lartë", ka thënë ministrja në një lidhje direkte për "News 24". Ajo ka lënë shteg të hapur për plotësimin e kërkesës së parë të studentëve, përgjysmimin e tarifave, por edhe kjo kërkon medoemos paraprakisht dialog me titullarët e universiteteve e fakulteteve. "Të ulemi dhe ta diskutojmë me rektorë e dekanë, pasi tarifat nuk përcaktohen nga qeveria, por nga institucionet e arsimit të lartë. Kemi dëshirën për një proces konkret për shqetësimet që ata kanë", tha ministrja duke mos përjashtuar as mundësinë për ndryshime në ligjin e arsimit të lartë, të cilën e cilëson si një reformë joperfekte. Në komunikimin gjatë edicionit informativ, Nikolla pranoi se këto ditë protestash ka reflektuar shumë duke menduar disa zgjidhje të situatës, deri edhe te dhënia e dorëheqjes. "Kam menduar shumë gjëra, por ajo që më shqetëson është zgjidhja e problemit dhe studentët të kthehen sa më shpejt në klasa". Të njëjtin qëndrim thotë se mban edhe Kryeministri. "Rama ndjek me shumë shqetësim dhe seriozitet protestën. Patjetër që ka komunikim dhe Kryeministri është i hapur për komunikim e dialog me studentët. Nuk flasim për negociata, flasim për komunikim për të ecur përpara me shumë çështje që studentët ngrenë", theksoi Nikolla duke shfrytëzuar më vonë edhe rrjetet sociale për të komunikuar me studentët, pas refuzimit direkt. Me një varg të gjatë pyetjesh, ajo këmbëngul për dialog dhe jo ultimatume, siç kanë bërë studentët. "Si ka mundësi që të protestohet dhe të mos dialogohet, kur je i ftuar t'i shtrosh në tryezë kërkesat? Si mund të bëhet një punë e mbarë me ultimatume dhe si mund të adresohet për më tepër problematika komplekse e universitetit, me kërkesa ultimative për tema shumë serioze që meritojnë të trajtohen seriozisht? Si mundet që një protestë kaq e mbarë në qëllimin e saj të afishuar, të mos artikulojë akoma një përfaqësi për dialog me qeverinë?", shkruan Nikolla në "Facebook". Sa i takon tarifës së shkollimit, ajo ua hedh topin universiteteve, të cilat janë ato që i kanë në dorë, ndonëse MAS- i përcakton çmimin tavan.