Balla: Kur proteston, duhet të ulesh dhe të zgjidhësh problematikat
Sekretari i Përgjithshëm i PS- së, Taulant Balla, tha dje se kur protestohet, duhet të flasësh me autoritetet për zgjidhjen e problematikave për të cilën proteston. Duke përfituar nga një aktivitet me të rinjtë e FRESSH- it në Elbasan me rastin e 8 Dhjetorit, Ditës së Rinisë shqiptare, Balla tha se "koha kur protestat nuk dëgjoheshin, ka përfunduar 5 vite më parë. Me vëmendjen për rininë dhe studentët, duke i dëgjuar të gjithë, do të rrisim mbështetjen për arsimin universitar publik dhe do të vijojmë investimet në konvikte edhe me mbështetjen e qeverive dhe organizmave financiare partnere". "Kur dikush proteston, duhet të ulet me autoritetet kompetente që problematikat të marrin zgjidhje. Pjesën më të madhe të problematikave i kemi ditur dhe vendimi i menjëhershëm i qeverisë për të anuluar pikën 4 të VKM- së së qeverisë për provimet e prapambetura, ishte i duhur", tha Sekretari i Përgjithshëm në PS. Sipas Ballës, qeveria do të bëjë një analizë të thellë të problematikave që kanë paraqitur studentët. "Është momenti që të bëjmë një analizë më të thellë për çfarë mund të bëjmë edhe më shumë për arsimin e lartë publik. Jam krenar që PS në qeverisje po i kthen pak nga pak dinjitetin arsimit të lartë publik", tha Balla. Ai kërkoi jo politizim të protestës së studentëve. "Askush nuk duhet të politizojë protestën, sepse ky do të jetë një proces normal komunikimi dhe, komunikimi dhe dialogu është mjeti i duhur. Studentët duhet të përfshijnë pedagogët, senatet, për të arritur në një qasje që të jetë sa e zbatueshme dhe aq e qëndrueshme në kohë", tha Balla dje nga Elbasani.