Protesta për shqiptarët e vrarë në Greqi, s'lejohen të tubojnë në Bularat
GJIROKASTER - Paralelisht me ceremoninë përkujtimore të Konstantinos Kaçifasit në Bularat, shoqatat patriotike shqiptare janë mbledhur në Gjirokastër në një tubim paqësor për shqiptarët e vrarë në Greqi. Me simbole patriotike në duar dhe më një flamur gjigant, ata protestuan pranë konsullatës greke në Gjirokastër. Protesta e mbajtur ne Gjirokastër kërkoi përmes një peticioni drejtuar autoriteteve shqiptare, për të garantuar të drejtat e emigrantëve shqiptarë në Greqi. Me flamuj kuqezi dhe me tingujt e këngës himn "Shqipëri o nëna ime", aktivistët hodhën valle pranë memorialit të Çerçiz Topullit si dhe mbajtën fjalime ku dënuan vrasjen e shqiptarëve në Greqi dhe qëndrimin e Ministrisë së Jashtme të Shqipërisë. Kjo protestë është për të kujtuar viktimat shqiptare në Greqi, që janë vrarë padrejtësisht edhe pse kanë qenë të pafajshëm", u shpreh një prej pjesëmarrësve. Shumë prej përfaqësuesve të protestuesve, të mbërritur edhe nga trojet shqiptare, kanë kërkuar gjithashtu garanci për respektimin e ligjit brenda hapësirës territoriale të Shqipërisë, ndërsa i kanë bërë thirrje minoritetit grek të mos u bashkohet qëllimeve që nxisin urrejtjen prej ekstremistëve të Agimit të Artë. Në protestë pati përfaqësues edhe nga shoqatat e Çamërisë, ku u ngritën pretendime për mohimin e pronave të çamëve në Greqi. Protesta ishte gjatë gjithë kohës paqësore, ndërsa mbajtja e një tubimi të ngjashëm pranë fshatit Bularat, ku zhvillohej përkujtimorja për Kaçifasin, nuk mori leje zyrtare nga Policia.