Skandali me Unazën e Re, hetime edhe për tenderin

Reagon Gjiknuri: Po pres përgjigjen e autoriteteve amerikane

Prokuroria e Tiranës pritet që të sekuestrojë javën që vjen të gjitha dokumentet për tenderin e ndërtimit të Lotit nr. 1 të Unazës së Re, ku fitues ka dalë konsorciumi "DH Albania" dhe "BIBA X".

Lëvizja e organit të akuzës vjen pas verifikimeve që janë bërë për publikimin e një skandali nga ana e emisionit "Të Paekspozuarit" të Ylli Rakipit në "News24". Emisioni në fjalë publikoi dokumente që dyshohet se janë të falsifikuara për firmën "DH Albania", me përfaqësues ligjor një 26- vjeçar, i cili fitoi tenderin rreth 18 milionë euro të projektit. Firma "DH Albania" figuron të jetë regjistruar si degë e "Dunwell Haberman", kompani e regjistruar në shtetin Delauerit, mirëpo dokumentet që ka dorëzuar në QKB edhe me firmën e sekretarit të këtij shteti, rezultojnë se janë falsifikuar. Për këtë arsye, Prokuroria e Tiranës kërkon të marrë, jo vetëm shkresat që dyshohet se janë falsifikuar, por të gjitha dokumentet e tenderimit dhe veprimet që ka bërë Këshilli Teknik i ARRSH- së. Në dorë të Prokurorisë së Tiranës do të jenë edhe vendimet e Komisionit të Vlerësimit të Ofertave, që kanë miratuar tenderin 18 milionë euro për konsorciumin në fjalë. Prokuroria ka nisur verifikimet për veprat penale të "shpërdorimit të detyrës", "falsifikimit të dokumenteve" dhe "shkeljes së barazisë në tenderë". Ka dyshime se "DH Albania" është themeluar më 25 qershor 2018, dy muaj përpara hapjes së tenderit dhe jo në vitin 1998, siç pretendon përmes një dokumenti të marrë në shtetin e Delauerit. Hetim për rastin ka nisur edhe Prokuroria në SHBA, pas dyshimeve për një krim të mundshëm federal. Atje po hetohet falsifikimi i një certifikate që mban firmën e Sekretarit të Shtetit të Delauerit, dorëzuar në QKB- në shqiptare se firma nuk kishte detyrime fiskale atje. Mirëpo, sipas një zëdhënësi të Sekretarit të Shtetit të Delauerit në SHBA, firma në fjalë nuk ka kërkuar të lëshohet ndonjë dokument për të. Ndërkohë, ditën e djeshme ka reaguar edhe ministri Gjiknuri për rastin në fjalë. "Unë si ministër i jam drejtuar autoriteteve amerikane për verifikimin zyrtar të shqetësimit të bërë publik në media. Kompania në fjalë nuk ka marrë asnjë qindarkë nga Buxheti i Shtetit dhe garancia e saj financiare do të sekuestrohet, në rast se dokumentet e paraqitura prej tyre në garë nuk janë autentike. Në fillimjavën e ardhshme, presim përgjigjen e autoriteteve amerikane. Nëse përgjigja do të konfirmojë falsifikimin e dokumenteve nga kompania, atëherë pa diskutim do të reagojmë menjëherë me zgjidhjen e njëanshme të kontratës dhe referimin e rastit pranë organeve të drejtësisë", shkruan Gjiknuri në një reagim në "Facebook".