“Lër të dashurin ose të vras”, babai kërcënon vajzën 18 vjeçe
Kryefamiljari mësoi se vajza maturante ishte lidhur me një djalë nga fshati
Babai përfundon në burg, pasi vajza 18 vjeçe e denoncoi atë për dhunë dhe kërcënim, sepse i ati i vuri ultimatum që të ndahej nga i dashuri i saj.
Ngjarja ndodhi dy ditë më parë në Divjakë, kur vajza maturante në gjimnazin e këtij qyteti, V. Gj., ka treguar në familje se prej disa kohësh ishte në një lidhje me një djalë. Pasi ka marrë të dhënat se cili ishte djali, babai i saj, 56- vjeçari me i inicialet N. Gj., i ka kërkuar së bijës të hiqte dorë menjëherë nga kjo lidhje dhe të vijonte pretendimet për shkollën e lartë. Por debati mes babë e bijë ka precipituar më tej me dhunë ndaj 18- vjeçares.
Sipas Policisë, babë e bijë kanë qenë në banesë kur ka nisur debati me fjalë mes tyre për një histori dashurie të vajzës, e cila nuk po gjente miratimin e babait të saj. Ai nuk ishte dakord me këtë lidhje, pasi përveçse djali ishte nga fshati, ishte edhe pa arsimim. Ndërsa e bija, përveçse ishte maturante në gjimnaz, do të vijonte studimet e larta. “Nuk mund të lidhesh me një djalë që nuk ka shkollë. Ti duhet të vazhdosh shkollën e lartë, ndaj duhet të heqësh dorë menjëherë nga kjo lidhje”. Ka qenë ky ultimatumi i babait ndaj vajzës së tij, por kjo e fundit nuk i është bindur duke i pohuar se e donte djalin me të cilin ishte lidhur dhe se nuk do të ndahej prej tij. Vajza ka kërkuar që i ati ta pranonte të dashurin e saj, por kjo ka përkeqësuar komunikimin mes tyre, fillimisht me debate e më pas deri edhe me dhunë e kërcënime. “Nëse nuk do të heqësh dorë nga kjo lidhje, do të të vras”, ka vijuar më tej 56- vjeçari mjaft i irrituar dhe i zhgënjyer me zgjedhjen e vajzës së tij. Por kjo e fundit, pasi është dhunuar nga i ati, i është drejtuar Policisë për ndihmë. Ajo është paraqitur ditën e djeshme e vetme, ku iu ka deklaruar efektivëve se i ati, përveçse e kishte dhunuar, e kishte kërcënuar deri edhe me vrasje. Ajo ka rrëfyer se e gjitha kjo kishte ardhur për shkak se ai i kishte zbuluar lidhjen me një djalë, të cilin i ati nuk e kishte pëlqyer. 18- vjeçarja ka kërkuar mbrojtje, pasi sipas saj, pas dhunës e kanosjes nga babai i saj, ajo ndihej e pasigurt. Pas dhënies së dëshmisë së maturantes, Policia ka ndërhyrë duke arrestuar babanë e saj. Ndaj tij mësohet se rëndon akuza “Dhunë në familje”. Ndërkohë, 56- vjeçari i arrestuar ka kërkuar nga Policia që të bëhen më të arsyeshëm dhe ta lirojnë. Ai është shprehur se mbyllja e tij në burg nënkupton liri të pakufizuar për të bijën, e cila sipas tij është në një moshë delikate dhe ka nevojë për t’i qëndruar pranë.