Protesta në të gjithë vendin për energjinë, taksat e naftën
Bllokohen rrugët kryesore në Elbasan, Shkodër e Vlorë
Protesta e studentëve në Tiranë nuk ishte e vetmja. Në protesta, paraditen e së martës ishin edhe qytetarë në disa qytete të vendit.
Njësoj si protesta e dy ditëve më parë në Kavajë, në Shkodër dje u protestua kundër çmimit të karburanteve dhe rritjes së taksave. Protestuesit kërkuan largimin e qeverisë, pasi sipas tyre, taksat janë bërë një barrë e papërballueshme. Protestuesit shkodranë bllokuan hyrjen e qytetit dhe dogjën goma, ndërkohë që kanë kërkuar nga qeveria që të reflektojë pasi ata do të përshkallëzojnë veprimet e tyre. Në protestë ishin edhe qytetarët dhe fermerët e Korçës dhe Devollit. Sipas fermerëve të Devollit, çmimi i karburanteve është bërë i papërballueshëm, ndërkohë që qeveria nuk jep subvencione. Në shenjë proteste, fermerët kanë hedhur prodhimet e tyre bujqësore, të cilat kanë ngelur të pashitura, sipas tyre për shkak të pafuqisë blerëse. Në Elbasan protestuesit kanë bllokuar rrugën e Bradasheshit, e cila përbën edhe një nga pikat kryesore të hyrjes në qytet. Protestuesit mbanin në duar pankarta ku kërkonin ulje të çmimit të energjisë elektrike dhe çmimit të naftës. Kësaj proteste i janë bashkuar edhe studentë të Universitetit të Elbasanit. Sipas tyre, përmes një veprimi të qëllimshëm të gjithë autobusët që të çojnë drejt kryeqytetit u bllokuan dhe u pamundësua bashkimi me protestuesit në kryeqytet.
Thirrja për organizimin e një proteste të infermierëve i ka kushtuar vendin e punës në Qendrën Spitalore Universitare “Nënë Tereza” në Tiranë, infermierit Elson Jaçaj. Burime të “Panorama” bëjnë me dije se Jaçaj ka bërë thirrje që infermierët dhe mjekët në të gjithë vendin t’i bashkohen protestës. Menjëherë pas këtyre thirrjeve, infermieri është thirrur në Drejtorinë e QSUT- së, ku edhe i është dorëzuar zarfi i shkarkimit nga puna. “E vërteta është thjesht organizimi i protestës dhe kërkesat që kemi ngritur si Shoqatë për Infermierët, që në thelb janë: rritje page, kushte më të mira pune; siguri në punë etj. Ka qenë kjo arsyeja që i ka bërë të reagojnë në këtë mënyrë duke bërë presion”, deklaron në media Jaçaj. Në protestë janë ngritur edhe infermierët në qytetin e Fierit me kërkesën për rritjen e pagave. Edhe në qytetin e Vlorës është zhvilluar një protestë, ku është kërkuar ulje e taksave nga qeveria. Sipas protestuesve, frymëzimi kryesor i këtyre protestave ka qenë ngritja e studentëve për të gjithë të drejtat e tyre. Për më shumë se një orë aksi Levan- Vlorë ka qenë i pakalueshëm, ndërkohë që protestuesit kanë bërë thirrje për largimin e qeverisë.