“Washington Post” e “NYT” shkruajnë për studentët
Agjencitë e mëdha si Reuters, AP dhe ANSA raportojnë ngjarjen
Protesta e studentëve ka kaluar edhe kufijtë e Shqipërisë, madje edhe kufijtë e Europës. Ditën e djeshme, protesta e studentëve ka bërë jehonë edhe në mediat më prestigjioze të Amerikës. Krahas agjencive prestigjioze të lajmeve “Associated Press”, Reuters dhe agjencisë italiane ANSA, edhe gazetat amerikane si “New York Times” dhe “Washington Post” kanë shkruar për atë që po ndodh në Tiranë prej disa ditësh. Prestigjiozja “Washington Post” shkruan se Kryeministri shqiptar Edi Rama nuk arriti të bindë studentët protestues të universiteteve publike që të shkojnë të takohen me të dhe të bisedojnë për kërkesat e tyre. “Duke mbajtur protestën para Ministrisë së Arsimit, ata kanë kërkuar që të përmbushen kërkesat e tyre, janë 8 pika për të cilat Kryeministri i sqaroi dje në një dalje live në “Facebook” dhe ofroi zgjidhje duke ftuar studentët të sh- kojnë e të bisedojnë”, shkruhet në gazetën amerikane. Krahas kësaj, “Washington Post” shkruan se kërkesat e tyre janë përgjysmimi i tarifave, dyfishim i buxhetit për arsimin dhe prani më e madhe e studentëve në bordet vendimmarrëse. Prej disa ditësh, studentët protestojnë në Tiranë për 8 pika që sipas tyre janë të pane- gociueshme. Kryeministri Rama ka shprehur disa herë qëndrimin e tij se qeveria është gati për dialog, por ka shtuar se bordet autonome të universitetit kanë autoritetin për të përmbushur ose refuzuar shumicën e kërkesave, duke përfshirë vendosjen e tarifës. Por ftesa e Kryeministrit për dialog është refuzuar disa herë nga studentët, të cilët vazhdimisht gjatë protestës së tyre u bëjnë thirrje partive politike të qëndrojnë larg, pasi ata kanë kauzën e tyre. Ditën e djeshme, disa prej studentëve theksuan se nëse nuk realizohen kërkesat e tyre, ata do të përshkallëzojnë protestën e tyre deri në grevë urie deri për plotësimin e kërkesave që ata kanë parashtruar.