Braho: Prokuroria tallet me denoncimet e ILDKPKI
“Prokuroria nuk pyet fare për denoncimet e këtij institucioni”
Deputeti i Partisë Socialiste, Spartak Braho, akuzoi dje institucionin e Prokurorisë, se nuk ndërmerr hetime për denoncimet që bën institucioni i ILDKPKI- së.
Gjatë mbledhjes së djeshme të Komisionit të Ligjeve ku u miratuan ndryshimet në ligjin për funksionimin e Inspektoratit të Lartë të Deklarimit dhe Kontrollit të Pasurive të Paluajtshme dhe Konfliktit të Interesit, deputeti Braho u shpreh se funksionimi i këtij institucioni është shumë i rëndësishëm dhe për këtë duhet që vetë ILDKPKI të ndërmarrë hetime. “Amendamentet e propozuara në projektligjin që po shqyrtojmë, janë thjesht procedurë. Ne bëjmë disa ndryshime procedurale të nevojshme dhe pa dyshim unë për këtë fakt mbështes si iniciatorin, ashtu edhe mendimet e relatores. Mua më shqetëson diçka tjetër. E dini ju kolegë të dashur që Prokuroria nuk pyet fare për denoncimet e këtij institucioni të rëndësishëm. Nuk e di se në çfarë raporti janë denoncimet që ka bërë ky institucion mjaft i rëndësishëm dhe çështjet penale që ka filluar Prokuroria. Deri më sot, Prokuroria, për opinionin tim, është tallur me denoncimet e bëra nga ky in- stitucion. Tani, ne e kemi ngushtuar të drejtën për fillimin e çështjes penale edhe me Kushtetutë dhe ia kemi veshur një organi siç është organi i Prokurorisë. Nuk e di, ne kontrollojmë, pra, ky institucion i varur nga Kuvendi kontrollon, dhe bën shumë mirë, por cili është rezultati. Ne duhet të vrasim mendjen që ky institucion të kthehet në një institucion që jo vetëm të kontrollojë, por edhe të evidentojë dhe t’u shkojë gjërave deri në fund. Unë fola bruto, gjithsesi do ta mbështes projektligjin e propozuar, por mendja më mbetet këtu, se si duhet forcuar ky institucion, që realisht të kthehet në një institucion efikas”, u shpreh deputeti Braho.
MBLEDHJA Gjatë mbledhjes së djeshme të Komisionit të Ligjeve, u miratuan ndryshimet në ligjin për funksionimin e Inspektoratit të Lartë të Deklarimit dhe Kontrollit të Pasurive të Paluajtshme. Ndryshimet konsistonin në deklarimin online të pasurive të subjekteve që janë pjesë e deklarimit të pasurisë. Krahas kësaj, mbledhja e Komisionit të Ligjeve u përfshi në një debat për sa i përket mandatit të kryetarit të ILDKPKI- së. Deputeti Bashkim Fino kërkoi që në ligj të zbatoheshin të njëjtat dispozita si në rastet e titullarëve të institucioneve të tjera si KLSH apo Banka e Shqipërisë, ku kryetari i institucionit të ketë të drejtë të rizgjidhet vetëm një herë. Por neni i ligjit për këtë çështje u miratua duke lënë që “Kryetari i ILDKPKI- së zgjidhet dhe ka një mandat 7- vjeçar”. Ky formulim i lënë nga ana e deputetëve nuk u pranua nga eksperti i EURALIU- s, i cili po ndiqte mbledhjen e Komisionit. Sipas tij, kryetari i ILDKPKI- së duhet të ketë vetëm një mandat, pasi zgjatja e tij në dy mandate krijon një pushtet shumë të lartë.