Mesazhi i Arta Markut: Prokurorët ia dolën kur të gjithë ishin skeptikë
Kryeprokurorja e përkohshme, Arta Marku, iu drejtua ditën e djeshme me një mesazh të gjithë prokurorëve që morën pjesë në Mbledhjen e Përgjithshme që zgjodhi 6 anëtarët nga organi i akuzës për Këshillin e Lartë të Prokurorisë. Sipas Markut, dita e djeshme shënon një pikë kthese në Reformën në Drejtësi dhe se prokurorët duhet të ndihen krenarë për votën e tyre. Marku shprehu falënderime të veçanta për trupin diplomatik në Shqipëri, që sipas saj ka qenë mbështetje, por edhe falënderoi OPDAT e EURALIUS për përkushtimin në çuarjen përpara të Reformës në Drejtësi. “Të gjithë bashkë sot duhet të ndihemi krenarë”, tha Marku në fjalën përmbyllëse të Mbledhjes së Përgjithshme të Prokurorisë. “Me votën tonë ne e krijuam institucionin e parë të drejtësisë së re, e hodhëm një gur themeli për të gjithë sistemin e drejtësisë. Të gjithë bashkë ne dëshmuam se jemi të përgjegjshëm. Treguam se ne mundemi t’ia dalim edhe kur të gjithë janë skeptikë ndaj nesh. Treguam se jemi një model që duhet ndjekur”, tha Marku. Ajo më pas shprehu falënderime edhe për pjesëmarrjen e lartë në votime, ku 293 prokurorë ishin të pranishëm nga 305 në total. “Ju falënderoj nga zemra për pjesëmarrjen dhe qytetarinë e treguar gjatë gjithë procesit. Gjatë gjithë këtij procesi kemi pasur mbështetjen pa kushte të partnerëve tanë të OPDAT dhe EURALIUS, të cilët i falënderoj në emër të gjithë trupës së prokurorëve. Mbështetja e tyre ka qenë motivim për ne. Një falënderim të veçantë, në emër të të gjithë prokurorëve edhe për përfaqësuesit e trupit diplomatik të akredituar në Shqipëri, si dhe ministres së Drejtësisë, të cilët na nderuan me praninë dhe fjalët inkurajuese gjatë pjesës së parë të procesit”, vijoi Marku. Më pas ajo shprehu falënderim për mediat dhe u uroi suksese prokurorëve që u zgjodhën anëtarë të KLP- së, duke inkurajuar për punë profesionale edhe ata që nuk u zgjodhën. “Faleminderit gjithë të ftuarve dhe të pranishme të tjerë, si edhe përfaqësuesve të mediave. Faleminderit dhe gjithë prokurorëve, kandidatë për Këshillin e Lartë të Prokurorisë. Ishin në lartësinë e detyrës dhe të denjë për garën që bënë. Suksese kandidatëve që u shpallën fitues. Po kështu, edhe atyre që nuk u shpallën fitues, por që vazhdojnë të jenë mes nesh, prokurorëve të shtetit shqiptar. Prokurorët ia dolën”, përmbylli Marku.