Gjiknuri: SHBA konfirmoi falsifikimin e dokumenteve, zgjidhëm kontratën
"Dokumentacioni ishte i plotë, por i falsifikuar. Nisin hetimet, çdo zyrtar, përkthyes apo noter i përfshirë do ndëshkohet"
Ministri i Infrastrukturës dhe Energjetikës, Damian Gjiknuri, deklaroi dje se kompania fituese për ndërtimin e lotit të parë të Unazës së madhe të Tiranës ka falsifikuar dokumentet dhe kjo është konfirmuar edhe nga autoritetet amerikane.
Bëhet fjalë për kompaninë "DH Albania", ku për herë të parë falsifikimi i dokumenteve u denoncua në emisionin "Të paekspozuarit" në "News 24". Kompania fitoi dy tendera me vlerë 30 milionë euro. Tenderi i dytë me vlerë 12 milionë euro u zhvillua nga Operatori i Sistemit të Transmetimit për ndërtimin e linjës elektrike Burrel- Peshkopi, i cili rezultoi fiktiv.
FALSIFIKIMI Ministri Gjiknuri tha se pas konfirmimit të autoriteteve amerikane, është zgjidhur kontrata me kompaninë dhe do të nisin procedurat për sekuestrimin e garancisë financiare. "Në datën 7 dhjetor, i jam drejtuar zyrtarisht me shkresë ambasadës amerikane, seksionit ekonomik- politik si dhe kam kontaktuar me kërkesën time përfaqësues të lartë të ambasadës në zyrën time, me synim lehtësimin e verifikimit sa më të shpejtë të dokumentacionit të kësaj kompanie. Nga konfirmimet e mbërritura nga institucionet e sipërpërmendura rezulton se një pjesë e dokumentacionit të paraqitur nga kompania "DH Albania" në procedurat e tenderit është i falsifikuar. Dokumentacioni i kërkuar në tender ka qenë i plotë nga ana formale, por ka qenë i falsifikuar, përfshirë edhe bilancet, të cilat aty kanë dhënë natyrën e punimeve, flukset financiare e të gjitha të tjerat si këto. Pas marrjes së këtij konfirmimi nga SHBA- të, Autoriteti Rrugor Shqiptar ka zgjidhur menjëherë kontratën në fjalë dhe do të fillojë procedurat për sekuestrimin e garancisë financiare në vlerën 10 për qind të kontratës", u shpreh Gjiknuri.
HETIMI Kreu i Infrastrukturës u shpreh se për falsifikimin e dokumenteve ka nisur edhe një hetim nga Prokuroria shqiptare, si edhe në SHBA. "Materialet e ardhura nga SHBA do t'i referohen Prokurorisë, e cila tashmë ka hapur një hetim për falsifikimin e dokumenteve zyrtare nga kompania "DH Albania". Të njëjtën praktikë ka ndjekur edhe Operatori i Sistemit të Transmetimit", tha Gjiknuri. Ministri Gjiknuri u shpreh se falsifikimi është kryer jashtë vendit dhe se autoritetet shqiptare kanë vepruar në respektim të ligjit. "Falsifikimi i dokumenteve rezulton të jetë filluar jashtë territorit të Shqipërisë. Siguroj opinionin publik se hapat e ndjekura nga ARRSH- ja për kryerjen e procedurës për tenderim kanë qenë në përputhje me legjislacionin në fuqi për prokurimin publik. Edhe oferta e paraqitur nga kompania në fjalë, në mënyrë elektronike, ka qenë në përputhje me kërkesat e dokumenteve të ten- derit që njeh legjislacioni. Legjislacioni në fuqi nuk kërkon verifikimin e informacionit të ofertuesve, përveç rasteve specifike, kur ka dyshime të arsyeshme për të dhëna të rreme", u shpreh Gjiknuri.
PËRGJEGJËSIT Ministri Gjiknuri u është përgjigjur edhe akuzave të opozitës, se ai ka udhëtuar në SHBA në kohën kur është krijuar kompania. Ministri Gjiknuri tha se në rast se këto akuza provohen, është i gatshëm të japë dorëheqjen. "Nëse unë kam shkelur në shtetin Delaware gjatë periudhës që unë kam qenë në Amerikë, për këtë jam gati të jap dorëheqjen. Në momentin kur Prokuroria e Shtetit do të gjejë përfshirjen qoftë edhe të një zyrtari të vetëm që ka ndihmuar apo bashkëpunuar në këtë falsifikim, kushdo qoftë ai, nga më i ulëti e deri tek unë, do të përgjigjet përpara ligjit. Kushdo zyrtar, qoftë edhe përkthyes apo noter, ata do të përgjigjen përpara ligjit", tha Gjiknuri.
PËR QIND
e vlerës së projektit është garancia financiare e depozituar nga kompania "DH Albania", e cila do të sekuestrohet nga qeveria, pas zgjidhjes së kontratës MILIONE EURO është vlera e dy tenderave të fituara nga kompania "DH Albania", degë e kompanisë Dunwell Haberman. Në dy prokurimet, kompania përdori dokumente të falsifikuara, si për ndërtimin e lotit I të Unazës me vlerë 18 milionë euro, edhe për ndërtimin e linjës elektrike Burrel- Peshkopi 12 milionë euro.