Pakti i Brexit, BE: Qartësojmë, por nuk rinegociojmë

Kryeministrja britanike, Theresa May, ka takuar disa liderë të BE- së në përpjekje për të marrë garanci se ndalesa doganorë irlandeze do të jetë e përkohshme, në përpjekje për të shpëtuar marrëveshjen e saj të Brexit, të kundërshtuar aq shumë nga ligjvënësit britanikë. Ajo nisi një turne nëpër disa vende të Europës. May është nën presion të fortë për të bërë ndryshime të mëdha në marrëveshje, si pikën mbi ndalesën doganore në kufirin irlandez, e cila e mban Britaninë të lidhur me rregullat doganore të BE- së dhe vendos kontrolle ekstra të tregut të përbashkët mbi Irlandën Veriore, në rast se nuk arrihet asnjë marrëveshje tregtare në kohë. Por “Plani B” është kundërshtuar nga kritikët pasi Mbretëria e Bashkuar nuk mund të dalë prej tij pa lejen e BE- së, duke ngritur shqetësime se Britania mund të mbetet në kurthin e Unionit përgjithmonë. Një opsion i ofruar nga parlamentarët britanikë ishte të kenë një votim vjetor nëse ndalesa në kufirin irlandez duhet të qëndrojë. Por kjo është kundërshtuar prerë nga Kancelarja gjermane, Angela Merkel, e cila këmbënguli se nuk ka asnjë mënyrë për të ndryshuar “Marrëveshjen e tërheqjes”. Po ashtu, duke goditur sërish përpjekjet e Theresa May, në një fjalim para eurodeputetëve të martën, Presidenti i Komisionit Europian, Jean Claude Juncker, dha të njëjtin mesazh duke deklaruar se ishte vetëm mundësia e qartësimit të asaj për çka ishte rënë dakord, pra jo më ndryshime apo rinegocime. Mesazhin më të “butë” e dha kreu i Këshillit të Europës, Donald Tusk, i cili ka shkruar: “Diskutime të gjata dhe të pastra me Kryeministren Theresa May përpara samitit të Brexit. E qartë që BE dëshiron të ndihmojë. Pyetja është se si”. May po takon liderë të BE në përpjekje për të zbutur marrëveshjen, në një kohë kur pozicioni i saj si Kryeministre është më i rrezikuar se kurrë. Me deputetë konservatorë nga partia e saj që janë duke e kundërshtuar çdo ditë e më shumë, May mund të përballet me një votë mosbesimi, ndërsa lobuesit e opsionit për të qëndruar në BE po luftojnë për të pasur një referendum të dytë. May do të udhëtojë sot në Irlandë pas një takimi me kabinetin e saj për të takuar Kryeministrin, Leo Varadkar. Të enjten ajo do të niset në Bruksel për samitin e Brexit.