1600 PERFITUES

Lista e re, të përndjekurit që marrin këstin e tretë

Ministria e Financave miratoi dje emrat e rinj të trashëgimtarëve që marrin këstin e tretë të dëmshpërblimit. Afatet e dokumentet që duhen

Ministria e Financës ka publikuar dje emrat e 1600 trashëgimtarëve, që kanë gati këstin e tretë të dëmshpërblimit.

Gazeta boton sot një pjesë të listës për të vijuar edhe nesër me pjesën e mbetur. Secili prej përfituesve ligjorë, që mund të jenë fëmijët ose nipërit dhe mbesat e të dënuarit, duhet të dorëzojë pranë sektorit të pagave dhe dëmshpërblimeve: kopje të letërnjoftimit, numër llogarie, certifikatë vdekjeje, certifikatë të trungut familjar, dëshmi trashëgimie dhe prokurë. Dosja konsiderohet e plotë dhe e gatshme për pagesë në momentin që secili prej trashëgimtarëve të ketë dorëzuar dokumentacionin e nevojshëm. Ata, të cilët e kanë përmbyllur këtë proces, nuk kanë asnjë detyrim, mjafton vetëm të presin. AFATET Për plotësimin e dosjes, familjarët e të dënuarve kanë tre muaj afat. Nëse nuk arrijnë që brenda këtij harku kohor të bëjnë plotësimet që kërkohen, atëherë e drejta për dëmshpërblim i kalon një të dënuari tjetër që është në radhë. Për ndarjen e çdo kësti do të ndiqet rendi kronologjik, çka do të thotë se ata që e kanë marrë të parët këstin e parë, do të jenë të parët që do të përfitojnë edhe këstin e tretë e kështu me radhë. Financat sqarojnë se pagesa e këstit vijues do të kryhet mbi bazë të dokumentacionit të dërguar më parë, kur nuk ka kontestim, nga rrethi i familjarëve ose të trashëgimtarëve.

FONDI Sa i takon fondit të mbetur, mësohet se janë rreth 250 milionë lekë që kanë mbetur nga fondi vjetor për kategorinë joparësore. Në këtë fazë të parë, Ministria e Financave ka bërë gati për pagesë një listë me 300 emra, të cilët do të bëhen publikë në ditët në vijim.