Meta kthen buxhetin në Kuvend: Mundësi reflektimi për kërkesat e studentëve
Reagon Rama: Asnjë çudi! Vazhdon pa pushim e në çdo formë presioni mbi studentët, për të qëndruar në kor kundër dialogut
Propozimet e Lëvizjes Socialiste për Integrim, për ndryshimin e buxhetit të shtetit për vitin 2019 ka çuar në një përplasje tjetër institucionale ndërmjet Presidentit Meta, Kryeministrit Rama dhe Kuvendit të Shqipërisë.
Maxhoranca argumentoi dje në seancë plenare se buxheti i shtetit për vitin 2019 nuk mund të ndryshohet pasi është ende i padekretuar nga ana e Presidentit. Menjëherë pas mbarimit të seancës plenare, zyra e shtypit e Presidencës bëri me dije se kreu i shtetit kishte kthyer për rishqyrtim projektligjin “Për buxhetin e shtetit për vitin 2019”. Si argument Presidenti Meta kishte situatën e krijuar ditët e fundit në kryeqytet, ku studentët protestojnë dhe në një ndër pikat e kërkesave të tyre është edhe rritja e financimit për Ministrinë e Arsimit. “Presidenti i Republikës Ilir Meta, duke ndjekur me shumë vëmendje situatën politike më të fundit në vend, si dhe duke vlerësuar konsensusin e gjerë publik mbi kërkesat e studentëve, të cilat janë konsideruar nga të gjithë aktorët politikë si të drejta, legjitime dhe të realizueshme, duke synuar interesin më të mirë në përmbushjen e objektivave sociale të parashikuara në nenin 59 të Kushtetutës, si dhe në garantimin e stabilitetit në vend, me dekretin nr. 10997, datë 13.12.2018 ka vendosur “Kthimin për rishqyrtim në Kuvend të ligjit nr. 99/ 2018 ‘ Për buxhetin e vitit 2019’, me qëllim rishqyrtimin e tij. Presidenti i Republikës ka besimin e plotë se Kuvendi i Shqipërisë do të reflektojë një bashkëpunim gjithëpërfshirës me qëllim plotësimin e kërkesave të studentëve dhe interesit publik”, thuhet në njoftimin për shtyp të Presidencës.
PËRPLASJET Menjëherë pas publikimit të lajmit se kreu i shtetit kishte kthyer për rishqyrtim në Kuvend buxhetin e shtetit, reagoi Kryeministri Rama. Nëpërmjet një postimi në faqen e tij në rrjetin social “Tëitter”, Kryeministri shkruan se mosdekretimi i buxhetit të shtetit erdhi menjëherë pas propozimeve të LSI- së duke akuzuar Presidentin si të përfshirë politikisht në çështjen e protestës së studentëve. “Interesant! Presidenti kthen buxhetin e Shqipërisë pas prezantimit të kërkesave të LSI- së. Asnjë çudi! Vazhdon pa pushim e në çdo formë presioni mbi studentët, për të qëndruar në kor kundër dialogut. Miq, dilni nga kurthi i atij kori dhe bëhuni individë që flasin në emër të vetes”, shkroi Rama. Por menjëherë pas reagimit të Kryeministrit, Presidenca reagoi sërish nëpërmjet zëdhënësit të Presidentit. Sipas tij, Presidenti i Republikës ishte bazuar edhe në qëndrimin që kreu i Grupit Parlamentar Taulant Balla mbajti në seancë plenare ndaj amendamenteve të LSI- së. Balla gjatë seancës, para ven- dimit të kreut të shtetit, theksoi se ligjit “Për Buxhetin e Shtetit për vitin 2019” është ende në tryezën e Presidentit Meta dhe ai nuk e ka dekretuar ende dhe për pasojë nuk mund të amendohet një ligj që nuk ka hyrë ende në fuqi. Sipas zëdhënësit të Presidentit, Tedi Blushi, ky ka qenë ndër argumentet e Metës në qëndrimin e tij për ta rikthyer ligjin për shqyrtim.
PROCEDURA Dekreti i Presidentit për kthimin për rishqyrtim të projektligjit “Për buxhetin e shtetit për vitin 2019” do të futet në procedurë parlamentare. Si fillim, ai duhet të kalojë në komisionin përgjegjës, atë për Ekonominë dhe Financat, i cili duhet të shprehet mbi qëndrimin e Presidentit duke reflektuar kërkesat e tij ose duke e rrëzuar atë. Më pas, ky dekret do të shkojë për votim në seancë plenare. Por problematika qëndron se ky dekret duhet të shqyrtohet brenda datës 21 dhjetor, që është edhe seanca e fundit plenare e parashikuar për këtë vit në mënyrë që viti 2019 ta gjejë vendin me një buxhet, pasi në të kundërt mund të shkaktohet kaos ekonomik në financat e vendit.