Hetimi i studentëve dhe Tupes, Lleshaj kundër Policisë
Zbulohet komunikata e brendshme e Policisë, 25 emrat e të proceduarve, rolet dhe akuzat
Ministri i Brendshëm, Sandër Lleshaj, kërkoi dje fjalën në Parlament, të parën si ministër i dekretuar, ku e quajti të pavërtetë lajmin e publikuar thuajse nga të gjitha mediat, për procedimin e 25 protestuesve, mes tyre edhe profesori Edmond Tupe.
Madje, ai paralajmëroi masa për struktura të posaçme të Policisë, që nuk e përgënjeshtruan lajmin në kohë. Lleshaj tha se është ndjerë i befasuar kur ka parë një lajm të tillë, pasi sipas tij nuk ka pasur asnjë lloj procedimi penal ndaj asnjë pedagogu apo asnjë studenti pjesëmarrës në protestat e ditëve të fundit. Por në një kohë që ministri i Brendshëm paralajmëron Policinë për masa, në mungesë të një përgënjeshtrimi, mediat disponojnë njoftimin zyrtar të Policisë së Shtetit, të shpërndarë ditën e mërkurë, që konfirmonte procedimet penale, ndonëse pa emra. Policia e niste njoftimin si një sqarim pas interesit të mediave, pra në përgjigje për pyetjet rreth masave që ishin marrë gjatë protestës së studentëve. Edhe pse aty nuk specifikohej konkretisht asgjë, se për cilën protestë bëhej fjalë, duke qenë se po zhvillohen disa të tilla në të gjithë vendin, konfirmohej fakti që kishin nisur procedime në zbatim të ligjit. Në këtë formë, ky njoftim zyrtar mund të interpretohet ndryshe nga ministri i Brendshëm, megjithëse as dje pas fjalës së tij në Parlament, Policia nuk pati ndonjë reagim tjetër zyrtar, që të sqaronte atë të parin. Në të tilla kushte, duket se ministri i Brendshëm mund të mos jetë informuar nga strukturat policore, rreth ekzistencës së një komunikate të brendshme, ku flitej me emra konkretë, për protestë konkrete, madje edhe akuza konkrete. MINISTRI I BRENDSHËM
Ministri i Brendshëm, nga foltorja e Parlamentit tha se e mori fjalën për një ndërhyrje të shkurtër që ka lidhje me protestat e studentëve. "Gjatë ditës së djeshme ( të mërkurën), ka qarkulluar që herët në mëngjes një lajm për kinse fillimin e procedurave penale ndaj disa studentëve dhe pedagogëve pjesëmarrës në protestat e zhvilluara këto ditë në vendin tonë. Ky lajm ka gjetur një jehonë të gjerë mediatike, publike, ka pasur disku- time, elaborime të shumta. Edhe miq të mi në radhët e profesorëve më kanë shqetësuar dje lidhur me pakuptimësinë e këtij lajmi, ose të kësaj ndërhyrjeje të Policisë dhe në momentin më të parë që gjeta kohë për t'u marrë me ketë çështje, i kam kërkuar Policisë së Shtetit informacione të detajuara rreth kësaj ndërhyrjeje, rreth këtij procedimi dhe për befasinë time të madhe rezulton që lajmi është plotësisht i pavërtetë. Dje nuk ka pasur kurrfarë procedimi penal ndaj asnjë pedagogu dhe ndaj asnjë stu- denti pjesëmarrës në protestat e vendit", tha Lleshaj. Ai tha se pas këtij konstatimi ka filluar procedurat për të nxjerrë përgjegjësinë ndaj atyre personave përgjegjës në Policinë e Shtetit, të cilët nuk kanë ndërmarrë hapat e nevojshme për ta përgënjeshtruar këtë lajm, i cili mori vëmendje të madhe publike dhe ngatërroi shumëçka. KOMUNIKATA E
BRENDSHME "Më datë 11.12.2018 u referuan materialet në Prokurorinë pranë Gjykatës së Shkallës Parë Tiranë, për sh- tetasit: Edmond Tupe, profesor, organizator; Estela Nazarko, studente, organizatore; Xhuljano Bregasi, student, organizator; Henri Fero, student, organizator; Andrea Gjini, student, aktivist i LSI, organizator për lëvizjen dhe bllokimin e rrugëve te sheshi ' Rilindja'; Kristina Tonaj, studente, aktiviste e formacionit FRD, organizatore; Gentian Doçi, student, aktivist i LSI; Migen Qiraxhi, student, organizator; Agron Pepaj, student, organizator për lëvizjen dhe bllokimin e rrugëve te sheshi ' Rilindja'; Nebih Bushaj, student, organizator për lëvizjen dhe bllokimin e rrugëve te sheshi ' Rilindja'; Mirela Ruko, aktiviste e Lëvizjes për Universitetin; Robert Aliaj, artist, organizator; Malbor Duka, student, organizator për lëvizjen dhe bllokimin e rrugëve te sheshi ' Rilindja'; Redi Muçi, student, organizator për lëvizjen dhe bllokimin e rrugëve tek sheshi ' Rilindja'; Klodian Leka, student, aktivist i Lëvizjes për Universitetin; Erdi Bërxulli, student, aktivist i Lëvizjes për Universitetin; Nerid Shehu, student, organizator; Bislim Lakna, student, organizator; Bledar Hysa, stu- dent, aktivist i Lëvizjes për Universitetin, organizator por dhe ka qëlluar me vezë në drejtim të Ministrisë së Arsimit; Luan Myrtaj, pedagog, organizator; Adriatik Lapaj, avokat, pjesëmarrës në protestën e studentëve; Altin Goxhaj, aktivist i shoqërisë civile, organizator për lëvizjen dhe bllokimin e rrugëve te sheshi ' Rilindja'; Liri Hajri Kuçi, studente, organizatore; Klajdi Bello, student, organizator për t'i drejtuar drejt Kryeministrisë; Gaetano Doçi, student, aktivist i LSI, organizator për lëvizjen dhe bllokimin e rrugëve te sheshi ' Rilindja', sepse në orën 09: 00, tek sheshi ' Nënë Tereza', në rrugën ' Muhamed Gjollesha' e më pas në Rrugën e Durrësit, përpara Ministrisë së Arsimit kanë protestuar në mënyrë të paligjshme, pa lejen e organeve kompetente duke prishur rendin e qetësinë publike, penguar qarkullimin e mjeteve të transportit, duke hedhur sende të forta në oborrin e institucionit. Punohet për identifikimin e personave të tjerë që kanë bllokuar rrugën te sheshi ' Rilindja', pasi janë të fotografuar. Nenet 150, 262, 274 dhe 293 të K. P.", thuhet në komunikatën e brendshme të Policisë.