Vrau në lokal pas sherrit për balerinën, arrestohet
Ervis Sinella u kap pasi Policia publikoi fotot e të kërkuarve
Arrestohet pas nëntë vitesh për vrasje, pasi Policia publikoi listën me emrat dhe fotot e personave të shpallur në kërkim.
Ervis Sinella, tashmë 35 vjeç, është dënuar për vrasjen e shtetasit Emiliano Sula, ngjarje e ndodhur në një lokal para Prokurorisë së Rrethit Gjyqësor Durrës, më 5 gusht 2009. Sipas Policisë, Ervis Sinella me banim në Kavajë është dënuar nga Gjykata e Durrësit ( vendim i lënë në fuqi nga Gjykata e Lartë) me 4 vite e 6 muaj burg për veprat penale “Vrasje e kryer në kapërcim të kufijve të mbrojtjes së nevojshme” dhe “Prodhim dhe mbajtje pa leje të armëve luftarake”.
MOTIVI Shkak për sherrin mes viktimës dhe autorit është bërë një prej balerinave të lokalit ku ndodhi ngjarja, të cilën e kishte ngacmuar Emiliano Sula ( viktima). Siç e bën të ditur Policia dinamikën e ngjarjes, rreth orës 02: 00 të datës 5 gusht 2009, viktima Emiljano Sula së bashku me shokët I. Sula, S. Gjoni dhe një tjetër i paidentifikuar kanë shkuar me makinën tip “Benz” të viktimës te një lokal përballë Prokurorisë Durrës, ku kishte muzikë dhe balerina që kërcenin. Administrator i lokalit ka qenë shtetasi F. Dedja dhe shoku i tij Ervis Sinella. Sipas hetimeve dhe deklarimeve në vendin e ngjarjes, viktima Emiliano Sula ka kërcyer me njërën nga balerinat, me të cilën ka pasur njohje. Por më pas ai ka pirë sasi të madhe alkooli dhe ngacmonte me mesazhe balerinën. Ajo ka lajmëruar pronarin Dedja. Ky i fundit ka veçuar shtetasin Emiliano Sula dhe i ka thënë të dilte nga lokali. Ai nuk e ka pritur mirë këtë kërkesë të administratorit dhe janë konfliktuar me fjalë e goditje. Në këtë moment, Sula ka dalë jashtë, ka shkuar te mjeti “Benz” dhe ka marrë një pistoletë duke qëlluar drejt shtetasve F. Dedja, Ervis Sinella dhe M. Himolli, të cilët po qëndronin në një tavolinë në cep të lokalit. Këtyre gjuajtjeve u është përgjigjur me armë Ervis Sinella dhe për pasojë ka humbur jetën Emiljano Sula. Në këtë moment, Ervis Sinella është larguar nga vendi i ngjarjes së bashku me armën. Ai u shpall në kërkim policor pasi u identifikua nga personat e tjerë të ndodhur në vendin e krimit.
ARRESTIMI Ervis Sinella ishte pjesë e listës së bërë publike nga Policia, që e rreshtonte 35vjeçarin si një prej 15 personave të konsideruar si më të rrezikshmit në territorin e Tiranës. Policia arriti të zbulonte vendndodhjen e tij falë publikimit të listës, ku iu bëri apel qytetarëve të jep- nin kontributin e tyre dhe të bashkëpunonin për gjetjen e të kërkuarve. Burime thanë për “Panorama” se falë informacioneve të mbërritura nga qytetarët u bë i mundur zbulimi i vendstrehimit të të shumëkërkuarit Ervis Sinella. Ai jetonte mes Tiranës dhe Durrësit dhe shumë rrallë shkonte në Kavajë. Në momentin e arrestimit, ai nuk bëri rezistencë, ndonëse Policia i kishte marrë të gjitha masat për ta realizuar në mënyrë të suksesshme operacionin për kapjen e tij.
Ervis Sinella ishte pjesë e listës së bërë publike nga Policia, që e rreshtonte 35- vjeçarin si një prej 15 personave të konsideruar si më të rrezikshmit në territorin e Tiranës. Policia arriti të zbulonte vendndodhjen e tij falë publikimit të listës, ku iu bëri apel qytetarëve të jepnin kontributin e tyre dhe të bashkëpunonin për gjetjen e të kërkuarve