Meta i kthen buxhetin Qeverisë, Rama: Protesta e studentëve, shuplakë për ne e grusht për opozitën
STUDENTET RRETHOJNE PARLAMENTIN E VIJOJNE PROTESTEN NE BULEVARD. RAMA NDAN FAJIN ME REKTORET. Ç’NDODHI NE KUVEND
Studentët protestuan këtë të enjte përpara Parlamentit dhe i kërkuan Kryeministrit Rama të plotësojë menjëherë tetë kërkesat e tyre përpara se të kërkojë dialog.
Në ditën e 9- të të qëndresës së tyre, mijëra studentë të Universitetit të Tiranës braktisën godinën e Kryeministrisë dhe Ministrisë së Arsimit ku kishin kaluar natën në protestë dhe u bashkuan të gjithë përpara Parlamentit. Mjaftoi një thirrje në rrjetet sociale “Nuk na përçani dot”, që të rinjtë e tetë fakulteteve të Tiranës të bëhen bashkë për t’u kërkuar në sy ligjvënëseve plotësimin e kërkesave. Të mbështetur nga gjimnazistë të kryeqytetit dhe të rinj të ardhur nga Durrësi, Elbasani dhe Shkodra, studentët ishin përpara Parlamentit në orën 10: 00. Kur kreu i Kuvendit, Gramoz Ruçi, lajmëroi njoftimin e seancës plenare studentët filluan me thirrjet “Plotësoni kërkesat”. Prania e përfaqësuesve të opozitës në Parlament dhe paraqitja e amendamenteve nuk e ndryshoi qëndrimin e studentëve për të mos mbështetur asnjë qëndrim apo vendim politik deri në një vendimmarrje të Kryeministrit për të plotësuar kërkesat. Me letra të bardha në duar, studentët për mbi 4 orë qëndruan para Parlamentit në një protestë që si rrallëherë nga protestat e tjera të zhvilluara përpara sallës së seancave plenare nuk kërkoi në asnjë moment ndërhyrjen e forcave të Policisë. Studentët i kujtuan Kryeministrit Rama se durimi i tyre po mbaron ndaj edhe kërkesat duhen plotësuar sa më parë.
LETRA Në ditën e 9- të të protestës së tyre, studentët kërkuan mbështetje në mënyrë që zëri i tyre të dëgjohet nga ndërkombëtarët. Përmes një letre, studentët e Arkitekturës, të cilët ishin edhe iniciatorët e protestave studentore, iu drejtuan ambasadës së SHBA- ve në Tiranë. Kërkesat e studentëve i janë adresuar zv. ambasadorit të SHBA- ve në Tiranë, Daniel Koski, të cilit i kërkohet që të japë mbështetje që protestat e studentëve të arrijnë objektivat. “Ne mendojmë se ju keni ndjekur nga afër atë që po ndodh gjatë këtyre ditëve. Studentët kanë qenë shumë këmbëngulës në kërkesat e tyre, por qeveria ende po sillet në një mënyrë arrogante dhe të papërshtatshme për një qeveri demokratike. Do të donim të kërkonim dhe ndihmën tuaj, kështu që protestat tona do të arrinin objektivat që kanë. Ju lutem konsiderojeni kauzën tonë si tuajën”, letra mban firmat e një grupi studentësh të Arkitekturës.
KRYEMINISTRIA Të bindur se Kryeministri Rama është i vetmi person, nga i cili mund të marrin një zgjidhje për kërkesat e tyre, studentët vendosën të braktisin protestën te Ministria e Arsimit për t’u zhvendosur te Kryeministria. Më herët, disa prej studentëve kanë shoqëruar me thirrjet “Turp”, “Turp”, “Turp” daljen nga dera e pasme e Kuvendit të disa prej deputetëve të PS- së. Gjatë ecjes në bulevardin “Dëshmorët e Kombit”, studentët kanë premtuar se nuk do të tërhiqen deri në plotësimin e kërkesave të tyre. Pas zhvendosjes përpara Kryeministrisë, disa prej studentëve që mbajtën fjalim me megafon, deklaruan se do ketë një grup për koordinimin e protestës, por nuk do të ketë asnjë grupim të deleguar për të negociuar me Kryeministrin Rama. Edhe këtë natë studentët e kaluan me temperaturat nën zero, por me solidaritetin e qindra qytetarëve të kryeqytetit që kanë ndihmuar me dru zjarri, ushqim dhe pije të ngrohta.