Rama pritet nga Mbreti Salman Al Saud
Marrëveshje në turizëm dhe ekonomi me Fondin Saudit të Zhvillimit
Kryeministri Rama, i cili ndodhet në Arabinë Saudite për një vizitë zyrtare, u prit dje nga Mbreti Salman bin Abdulaziz Al Saud, në pallatin mbretëror. "Mbreti përshëndeti Kryeministrin shqiptar dhe delegacionin shoqërues në Mbretëri, ndërsa Kryeministri shprehu lumturinë e tij për të vizituar Mbretërinë dhe për të takuar Mbretin", thuhet në njoftimin e Agjencisë Saudite të Shtypit. Për nder të mikut nga Shqipëria, Mbreti saudit, Salman bin Abdulaziz Al Saud, shtroi një drekë ku merrnin pjesë shumë të ftuar të rëndësishëm. Sipas Agjencisë saudite të shtypit, pritja e Mbretit dhe banketi u ndoqën nga princi Khalid bin Fahd bin Khalid, princi Faisal bin Bandar bin Abdulaziz, guvernator i rajonit të Rijadit dhe një numër i madh princash. Sipas të njëjtit burim, Kryeministri i Shqipërisë Edi Rama është pritur në rezidencën e tij nga kryetari i Bordit të Drejtorëve të Komisionit Saudit për Turizmin dhe Trashëgiminë Kombëtare ( SCTH) dhe kryetari i Bordit të Drejtorëve të Fondit Saudit për Zhvillim, Ahmed bin Aqel Al- Khatib. Gjatë takimit, të dy palët shqyrtuan mundësitë e investimeve midis dy vendeve dhe aspektet e bashkëpunimit në sektorin e zhvillimit ndërkombëtar. Kryeministri Rama ka postuar një video në llogarinë e tij në "Facebook", ku tregohet pritja e Mbretit saudit Salman bin Abdulaziz Al Saud. "Në pritjen shumë miqësore të mbretit Salman ibn Abdulaziz Al Saudi, ku pas drekës zyrtare u nënshkruan disa marrëveshje të rëndësishme bashkëpunimi", shkruan Rama në përshkrimin e videos nga ky takim. Kreu i qeverisë njoftoi dhe takimin në Riad me drej- tuesin e Fondit Saudit të Zhvillimit. Rama bën të ditur se në fokus të këtij takimi ishte "programi i projekteve të propozuara prej nesh në disa fusha, ekonomi, turizëm, arsim dhe trashëgimi kulturore", për të cilat nuk munguan dhe marrëveshjet e nënshkruara nga ministrat respektivë. Kryeministri Rama shoqërohet në këtë vizitë zyrtare nga ministrja e Financave dhe Ekonomisë, Anila Denaj, zv. ministri i Jashtëm, Etjen Xhafaj dhe drejtori i ri i Fondit Shqiptar të Zhvillimit, Dritan Agolli.